ബൈക്കില്‍ സഞ്ചരിച്ച യുവതിയുടെ മാല പൊട്ടിച്ചെടുക്കാന്‍ ശ്രമം; പ്രതി പിടിയില്‍

പിതാവിനൊപ്പം ബൈക്കില്‍ വീട്ടിലേക്കു പോകുകയായിരുന്ന യുവതിയുടെ മാല പൊട്ടിച്ചെടുക്കാന്‍ ശ്രമം. വെള്ളിയാഴ്ച രാത്രി 9.30ന് വിളപ്പില്‍ശാല-കാട്ടാക്കട റോഡില്‍ മലപ്പനംകോട് ഭാഗത്തുവച്ചാണു സംഭവം. ബൈക്കില്‍ നിന്ന് വീണു യുവതിക്കും പിതാവിനും പരുക്കേറ്റു. ഐഎസ്ആര്‍ഒ ഉദ്യോഗസ്ഥയായ വിളപ്പില്‍ശാല വടക്കേ ജംക്ഷന്‍ കാര്‍ത്തികയില്‍ ജ്യോതിഷ, പിതാവ് ഗോപകുമാര്‍ എന്നിവര്‍ക്കാണു പരുക്കേറ്റത്. ജ്യോതിഷ നാലു മാസം ഗര്‍ഭിണിയാണ്. സ്‌കൂട്ടറില്‍ എത്തിയ പൂവച്ചല്‍ ഉണ്ടപ്പാറ മാവിള ജെപി ഭവനില്‍ ജയപ്രകാശ് ആണു മാല പൊട്ടിച്ചെടുക്കാന്‍ ശ്രമിച്ചത്. കവര്‍ച്ചാ ശ്രമം പരാജയപ്പെട്ട ശേഷം കടന്നു കളയാനുള്ള ശ്രമത്തിനിടെ സ്‌കൂട്ടറില്‍ നിന്നു വീണ് ജയപ്രകാശിനും പരുക്കേറ്റു. ബഹളം കേട്ടെത്തിയ നാട്ടുകാരും മറ്റു യാത്രക്കാരും ഇയാളെ പൊലീസിനു കൈമാറി.