വിഷ്ണു ഇനി ആറു പേരിലൂടെ ജീവിക്കും : കണ്ണൂരില്‍ മസ്തിഷ്‌ക്ക മരണം സംഭവിച്ച യുവാവിന്റെ അവയവദാനം ചെയ്ത് മാതാപിതാക്കള്‍

കണ്ണൂര്‍ : ബൈക്ക് അപകടത്തില്‍ ഗുരുതരമായി പരിക്കേറ്റ് മസ്തിഷ്‌ക മരണം സംഭവിച്ച യുവാവ് അവയവദാനത്തിലൂടെ ആറ് പേര്‍ക്ക് ജീവനേകി. കൂത്തുപറമ്പ് തൃക്കണ്ണാപുരം 'നന്ദന'ത്തില്‍ എം ടി വിഷ്ണുവാണ് (27 ) ഇനി ആറുപേരിലൂടെ ജീവിക്കുക. ബംഗളൂരുവില്‍ ബൈക്കുകള്‍ തമ്മില്‍ കൂട്ടിയിടിച്ചുണ്ടായ അപകടത്തില്‍ ഗുരുതര പരിക്കേറ്റ വിഷ്ണുവിനെ വെള്ളി രാവിലെയാണ് കോഴിക്കോട് ആസ്റ്റര്‍ മിംസിലെത്തിച്ചത്. ഇതിനോടകം തന്നെ മസ്തിഷ്‌ക മരണം സംഭവിച്ചിരുന്നു. വിവരം മാതാപിതാക്കളെ ആശുപത്രി അധികൃതര്‍ ബോധ്യപ്പെടുത്തിയപ്പോള്‍ അവയവദാനത്തിന് തയ്യാറാവുകയായിരുന്നു. മരണശേഷവും ആറ് പേരിലൂടെ മകന്‍ ജീവിക്കുമെങ്കില്‍ അതാണ് ഞങ്ങള്‍ക്ക് സന്തോഷം എന്ന് പറഞ്ഞാണ് അച്ഛനും അമ്മയും അവയവദാനത്തിന് പുര്‍ണ മനസ്സോടെ സമ്മതം നല്‍കിയത്. കരള്‍, രണ്ട് വൃക്ക, ഹൃദയം, കോര്‍ണിയ എന്നിവയാണ് ദാനം ചെയ്തത്. ഇതില്‍ ഒരു വൃക്കയും കരളും കോര്‍ണിയയും ആസ്റ്റര്‍ മിംസിലെ തന്നെ രോഗികള്‍ക്കാണ് ലഭ്യമാവുക. മറ്റുള്ള അവയവങ്ങള്‍ സര്‍ക്കാര്‍ നിര്‍ദേശമനുസരിച്ച് വിട്ടുകൊടുക്കും. രാത്രി 10ന് തന്നെ അവയവം നീക്കം ചെയ്യുന്ന ശസ്ത്രക്രിയകള്‍ ആരംഭിച്ചു. ബംഗളൂരുവില്‍ ഏവിയേഷന്‍ കോഴ്‌സ് വിദ്യാര്‍ഥിയായിരുന്നു വിഷ്ണു . അച്ഛന്‍: സുനില്‍ കുമാര്‍ ബിഎസ്എന്‍എല്‍ ജീവനക്കാരനാണ്. അമ്മ: ചിത്ര എറണാകുളം കാംകോയില്‍ ജോലി ചെയ്യുന്നു. സഹോദരി: കൃഷ്ണപ്രിയ.