സ്വന്തം ചെലവില്‍ നാടിന് വേണ്ടി ഇന്‍ഡോര്‍ സ്റ്റേഡിയം നിര്‍മിച്ച് കായികാധ്യാപകന്‍

സ്വന്തം ചെലവില്‍ നാടിന് വേണ്ടി ഇന്‍ഡോര്‍ സ്റ്റേഡിയം നിര്‍മിച്ച് വൈക്കത്തെ കായികാധ്യാപകന്‍ ടിസി ഗോപി. വീടിനോട് ചേര്‍ന്നുള്ള പതിനഞ്ച് സെന്റിലാണ് തന്റെ സമ്പാദ്യവും ജോലിയില്‍ നിന്ന് വിരമിച്ചപ്പോള്‍ കിട്ടിയ തുകയും ഉപയോഗിച്ച് ഗോപി സാര്‍ സ്റ്റേഡിയം ഒരുക്കിയത്. ചേര്‍ത്തലയിലെ സര്‍ക്കാര്‍ ഗേള്‍സ് ഹൈസ്‌കൂളില്‍ നിന്ന് വിരമിച്ചതോടെയാണ് നാടിനായി സ്വന്തം ചെലവില്‍ ഒരു ഇന്‍ഡോര്‍ സ്റ്റേഡിയം നിര്‍മിക്കാന്‍ ഗോപി തീരുമാനിച്ചത്. വോളിബോള്‍, ഷട്ടില്‍, ത്രോബോള്‍, ക്രിക്കറ്റ്, അത്ലറ്റിക് പരിശീലനം എന്നിവ ലക്ഷ്യമിട്ടാണ് സ്റ്റേഡിയം ഒരുക്കിയിട്ടുള്ളത്. തന്റെ കുട്ടിക്കാലത്ത് വോളിബോള്‍ കളിക്കാന്‍ ഒത്തിരി ബുദ്ധിമുട്ടുകള്‍ സഹിക്കേണ്ടി വന്നിരുന്നു. അതുകൊണ്ട് നാട്ടിലെ സാധാരണ വിദ്യാര്‍ഥികള്‍ക്ക് വേണ്ടിയാണ് ഗോപിയുടെ ഈ പ്രയത്‌നം. നിരവധി വിദ്യാര്‍ഥികളെ ദേശീയ സംസ്ഥാന താരങ്ങളാക്കിയ കായികാധ്യാപകനാണ് ഗോപി റബര്‍ മാറ്റടക്കം വിരിച്ച് എല്ലാ സംവിധാനങ്ങളോടെയാണ് സ്റ്റേഡിയം പൂര്‍ത്തിയാക്കിയത്. വോളിബോള്‍ കളിക്കാരനായ ഗോപി കളിക്കളത്തില്‍ തന്റെ പൊസിഷന്റെ പേരായ ലിബറൊ എന്നാണ് സറ്റേഡിയത്തിന് നല്‍കിയത്. 34 വര്‍ഷം കായികാധ്യാപകനായിരുന്ന ഗോപി വോളിബോള്‍ ആലപ്പുഴ ജില്ലാ പരിശീലകന്‍ കൂടിയായിരുന്നു. തന്റെ നാട്ടിലെ കുട്ടികള്‍ക്ക് വോളിബോളിലും അത്ലറ്റിക്സിലും ബാഡ്മിറ്റണിലുമൊക്കെ കുറ്റമറ്റ പരീശീലനം നല്‍കി കായിക രംഗത്തേക്ക് പിടിച്ചുയര്‍ത്തുകയാണ് ഈ മാതൃകാ അധ്യപകന്റെ ലക്ഷ്യം.