കൊലക്കേസ് പ്രതികള്‍ക്കൊപ്പം മദ്യസേവ; പൊലീസുകാരന് സസ്‌പെന്‍ഷന്‍

യൂണിഫോമില്‍ കൊലപാതകകേസ് പ്രതികളുടെ മദ്യ സല്‍ക്കാരത്തില്‍ പങ്കെടുത്ത പൊലീസ് ഉദ്യോഗസ്ഥന് സസ്‌പെന്‍ഷന്‍. പോത്തന്‍കോട് സ്റ്റേഷനിലെ സിവില്‍ പൊലീസ് ഓഫിസറായ ജിഹാനെയാണ് സസ്‌പെന്‍ഡ് ചെയ്തത്. പൊലീസ് ഓഫിസര്‍ ജിഹാന്‍ യൂണിഫോമിലിരുന്ന് മദ്യസേവ നടത്തുന്നതിന്റെ ചിത്രം പുറത്തുവന്നു. കൂടെയിരിക്കുന്നതു കൊലക്കേസ് പ്രതികളും. ഫെബ്രുവരിയില്‍ ഗുണ്ടാ നേതാവ് മെന്റല്‍ ദീപുവിനെ തലയ്ക്കടിച്ചു കൊന്നത് ഉള്‍പ്പെടെയുള്ള കേസുകളിലെ മുഖ്യപ്രതിയായ അയിരൂപ്പാറ കുട്ടന്റെ നേതൃത്വത്തിലായിരുന്നു മദ്യസല്‍ക്കാരം. ദീപു കൊല്ലപ്പെടുന്നതിനു മൂന്നുദിവസം മുന്‍പായിരുന്നു പാര്‍ട്ടി നടന്നത്. മദ്യ സല്‍ക്കാരത്തില്‍ പങ്കെടുക്കുന്ന ജിഹാന്റെ ഫോട്ടോ റേഞ്ച് ഐജി നിശാന്തിനിക്ക് ലഭിച്ചതോടെയാണ് അന്വേഷണമാരംഭിച്ചത്. വകുപ്പുതല അന്വേഷണത്തില്‍ ഉദ്യോഗസ്ഥന്റെ ഭാഗത്തു ഗുരുതരമായ വീഴ്ച കണ്ടെത്തി. തുടര്‍ന്നാണ് സസ്‌പെന്‍ഡ് ചെയ്തത്. ഇയാള്‍ക്കെതിരെ ലോക്ക് ഡൗണ്‍ സമയത്ത് അനധികൃത വിദേശ മദ്യം തമിഴ്‌നാട്ടില്‍ നിന്നു കടത്തിയതിന് ഒത്താശ ചെയ്തതിന്റെ പേരിലും അന്വേഷണം നടക്കുന്നുണ്ട്. പോത്തന്‍കോട് സ്റ്റേഷനിലെ ചില ഉദ്യോഗസ്ഥര്‍ മണല്‍- ഗുണ്ടാ സംഘങ്ങളുമായി നടത്തുന്ന ഇടപാടുകള്‍ സംബന്ധിച്ച് സ്‌പെഷല്‍ ബ്രാഞ്ച് റിപ്പോര്‍ട്ട് നല്‍കിയിട്ടുണ്ട്.