ദിലീപ് അടക്കമുള്ള പ്രതികള്‍ നശിപ്പിച്ചത് 12 വാട്സാപ്പ് ചാറ്റുകള്‍; വീണ്ടെടുക്കാന്‍ ക്രൈംബ്രാഞ്ച്

കൊച്ചി: വധഗൂഢാലോചന കേസില്‍ ദിലീപ് അടക്കമുള്ള പ്രതികള്‍ 12 വാട്സാപ്പ് ചാറ്റുകള്‍ പൂര്‍ണമായും നശിപ്പിച്ചെന്ന് ക്രൈംബ്രാഞ്ച്. ഫോണുകള്‍ കോടതിയില്‍ ഹാജരാക്കുന്നതിന് തലേദിവസമാണ് വാട്സാപ്പ് ചാറ്റുകള്‍ നശിപ്പിച്ചത്. ഈ ചാറ്റുകളുടെ വിവരങ്ങള്‍ വീണ്ടെടുക്കാനായി ക്രൈംബ്രാഞ്ച് ഫൊറന്‍സിക് സയന്‍സ് ലാബിന്റെ സഹായം തേടിയിട്ടുണ്ട്. രണ്ടുദിവസത്തിനകം ഇതുസംബന്ധിച്ച ഫൊറന്‍സിക് റിപ്പോര്‍ട്ട് ലഭിച്ചേക്കുമെന്നാണ് സൂചന. ജനുവരി 30-ന് ഉച്ചയ്ക്ക് 1.36-നും 2.32-നും ഇടയിലുള്ള സമയത്താണ് 12 വാട്സാപ്പ് ചാറ്റുകള്‍ നശിപ്പിക്കപ്പെട്ടത്. ഇത് വാട്സാപ്പ് മെസേജുകളോ കോളുകളോ ആകാം. കേസുമായി ബന്ധപ്പെട്ട നിര്‍ണായക തെളിവുകളാണ് ഈ വാട്സാപ്പ് ചാറ്റുകളെന്നും അന്വേഷണസംഘം സംശയിക്കുന്നു. നശിപ്പിക്കപ്പെട്ട വിവരങ്ങള്‍ വീണ്ടെടുക്കാന്‍ ചണ്ഡീഗഢിലെ കേന്ദ്രലാബില്‍ ഫോണുകള്‍ പരിശോധിക്കാനും ക്രൈംബ്രാഞ്ച് ആലോചിക്കുന്നുണ്ട്. നേരത്തെ ദിലീപ് അടക്കമുള്ളവരുടെ ഫോണുകളിലെ വിവരങ്ങള്‍ നശിപ്പിച്ചതായി ക്രൈംബ്രാഞ്ച് കണ്ടെത്തിയിരുന്നു. മുംബൈയിലെ ഒരു ലാബിന്റെ സഹായത്തോടെയാണ് ഫോണുകളിലെ വിവരങ്ങള്‍ നശിപ്പിച്ചത്.നാല് ഫോണുകള്‍ ഇതിനായി മുംബൈയിലേക്ക് കൊറിയര്‍ അയച്ചെന്നും കോടതി ഹാജരാക്കാന്‍ ആവശ്യപ്പെട്ടതിന് പിന്നാലെ ദിലീപിന്റെ അഭിഭാഷകരെത്തി ഈ ഫോണുകള്‍ മുംബൈയില്‍നിന്ന് കൊണ്ടുപോയതായും ക്രൈംബ്രാഞ്ചിന്റെ റിപ്പോര്‍ട്ടിലുണ്ടായിരുന്നു. ഫോണുകളില്‍നിന്ന് നശിപ്പിക്കപ്പെട്ട ചില വിവരങ്ങളുടെ മിറര്‍ ഇമേജുകള്‍ ക്രൈംബ്രാഞ്ച് സംഘത്തിന് വീണ്ടെടുക്കാനായിട്ടുണ്ട്.