പോക്‌സോ കേസ്: റോയ് വയലാറ്റിനെയും സൈജു തങ്കച്ചനെയും റിമാന്‍ഡ് ചെയ്തു

പോക്‌സോ കേസില്‍ അറസ്റ്റിലായ നമ്പര്‍18 ഹോട്ടല്‍ ഉടമ റോയ് വയലാറ്റിനെയും കൂട്ടുപ്രതി സൈജു തങ്കച്ചനെയും കോടതി റിമാന്‍ഡ് ചെയ്തു. കോടതിയില്‍ ഹാജരാക്കുന്നതിനു മുന്‍പ് റോയ് വയലാറ്റിന് ആരോഗ്യ പരിശോധന നടത്തിയപ്പോള്‍, രക്തസമ്മര്‍ദം ഉയര്‍ന്നിരുന്നതിനാല്‍ നിരീക്ഷണത്തിലാക്കി. പോക്‌സോ കേസുകള്‍ പരിഗണിക്കുന്ന സെഷന്‍സ് കോടതി ജഡ്ജി ആശുപത്രിയിലെത്തിയാണ് റോയ് വയലാറ്റിനെ റിമാന്‍ഡ് ചെയ്തത്. രാവിലെ 10ന് കളമശേരി മെട്രോ പൊലീസ് സ്റ്റേഷനില്‍ കീഴടങ്ങിയ സൈജുവിനെ അപ്പോള്‍തന്നെ ചോദ്യം ചെയ്തിരുന്നു. ഞായറാഴ്ച കീഴടങ്ങിയ റോയ് വയലാറ്റിനൊപ്പവും ചോദ്യം ചെയ്തു. തുടര്‍ന്ന് സൈജുവിനെ അന്വേഷണസംഘം കൊച്ചിയിലെ സ്വകാര്യ ഹോട്ടലിലെത്തിച്ച് തെളിവെടുത്തശേഷമാണ് അറസ്റ്റ് രേഖപ്പെടുത്തിയത്. റോയ് വയലാറ്റിനെയും സൈജു തങ്കച്ചനെയും ഉച്ചയ്ക്കു 2നാണ് കൊച്ചി കമ്മിഷണര്‍ ഓഫിസില്‍നിന്ന് കോടതിയിലേക്കു കൊണ്ടുപോയത്. കോടതിയിലേക്കുള്ള യാത്രയ്ക്കിടെ ഇരുവരെയും ആരോഗ്യ പരിശോധനയ്ക്കു വിധേയമാക്കി. കോടതിയില്‍ ഹാജരാക്കിയപ്പോള്‍ സൈജുവിനെ പൊലീസ് കസ്റ്റഡിയില്‍ വിട്ടുനല്‍കി. മാര്‍ച്ച് 16 വരെയാണ് സൈജുവിനെ പൊലീസ് കസ്റ്റഡിയില്‍ വിട്ടത്. പരാതിക്കാരിയെയും മറ്റു പെണ്‍കുട്ടികളെയും കൊച്ചിയിലെത്തിച്ച വാഹനം കണ്ടെത്തണമെന്നും പ്രതികള്‍ക്കെതിരെ മറ്റു കേസുകളുണ്ടോ എന്നു പരിശോധിക്കണമെന്നും പൊലീസിന്റെ റിമാന്‍ഡ് റിപ്പോര്‍ട്ടില്‍ പറയുന്നു. കേസില്‍ മുന്‍കൂര്‍ ജാമ്യം ലഭിച്ച മൂന്നാം പ്രതി അഞ്ജലി റിമാദേവിന് ചോദ്യം ചെയ്യലിനു ഹാജരാവാന്‍ നോട്ടിസ് നല്‍കി. ബുധനാഴ്ച ഹാജരാകാനാണ് നിര്‍ദേശം.