പീഡനക്കേസ്: ‘പരാതികള്‍ കെട്ടിച്ചമച്ചത്’; മുന്‍കൂര്‍ ജാമ്യം തേടി അനീസ് അന്‍സാരി

ലൈംഗിക പീഡനക്കേസില്‍ പൊലീസ് തിരയുന്ന കൊച്ചിയിലെ പ്രമുഖ മേക്കപ്പ് ആര്‍ട്ടിസ്റ്റ് അനീസ് അന്‍സാരി മുന്‍കൂര്‍ ജാമ്യാപേക്ഷയുമായി ഹൈക്കോടതിയില്‍. തനിക്കെതിരായ പരാതികള്‍ കെട്ടിച്ചമച്ചതാണെന്ന വാദവുമായാണ് അനീസ് ഹൈക്കോടതിയെ സമീപിച്ചത്. അനീസിനെ കണ്ടെത്താനാകാതെ വന്ന പൊലീസ് ഇയാളുടെ ബന്ധുവിനെയും സുഹൃത്തിനെയും കസ്റ്റഡിയില്‍ എടുത്തിരുന്നെങ്കിലും ഇന്നു രാവിലെ വിട്ടയച്ചു. പരാതി ഉയര്‍ന്നതോടെ ദുബായിലേക്കു പോയ അനീസ്, നാല് ദിവസം മുന്‍പു തിരിച്ചു കേരളത്തിലെത്തിയിട്ടുണ്ടെന്നാണു പൊലീസ് പറയുന്നത്. ഇയാളുടെ പാസ്‌പോര്‍ട്ട് പൊലീസിനു ലഭിച്ചിട്ടുണ്ട്. അനീസ് അന്‍സാരിക്കെതിരെ അഞ്ച് കേസുകള്‍ പൊലീസ് റജിസ്റ്റര്‍ ചെയ്തു. ഇതുവരെ ഏഴു പരാതികള്‍ ഇയാളെക്കുറിച്ചു ലഭിച്ചിട്ടുണ്ട്. പരാതികളില്‍ മൊഴിയെടുപ്പു പൂര്‍ത്തിയാക്കിയ ശേഷം കൂടുതല്‍ കേസുകള്‍ റജിസ്റ്റര്‍ ചെയ്യുമെന്നാണ് പൊലീസ് അറിയിച്ചിരിക്കുന്നത്. വൈറ്റിലയ്ക്കടുത്തു ചളിക്കവട്ടത്ത് ഇയാളുടെ ഉടമസ്ഥതയിലുള്ള അനീസ് അന്‍സാരി യൂണിസെക്‌സ് സലൂണ്‍ ബ്രൈഡല്‍ മേക്കപ്പ് സ്ഥാപനത്തില്‍ ലൈംഗിക അതിക്രമം നേരിട്ടെന്നാണ് വിദേശത്തുള്ള പത്തനംതിട്ട സ്വദേശിനിയായ വനിത കഴിഞ്ഞ ദിവസം നല്‍കിയ പരാതി. 2019ല്‍ വിവാഹ മേക്കപ്പിനു ബുക്ക് ചെയ്ത താന്‍ ട്രയല്‍ മേക്കപ്പിനായി വിവാഹത്തിന് ഒരാഴ്ച മുന്‍പു സ്റ്റുഡിയോയില്‍ എത്തിയപ്പോള്‍ അനീസ് വസ്ത്രം അഴിച്ചുമാറ്റുകയും അപമര്യാദയായി പെരുമാറുകയും ചെയ്‌തെന്നാണ് ആദ്യം അനുഭവം പങ്കുവച്ച യുവതിയുടെ പരാതി. ഇതോടെ മേക്കപ് ചെയ്യുന്നതു നിര്‍ത്താന്‍ ആവശ്യപ്പെട്ടെന്നും ബുക്കിങ് റദ്ദാക്കിയെന്നും ഇവര്‍ വെളിപ്പെടുത്തിയിരുന്നു.