മദ്യലഹരിയില്‍ സഹോദരങ്ങള്‍ തമ്മില്‍ അടിപിടി; ഒരാള്‍ക്ക് വെടിയേറ്റു

മദ്യലഹരിയില്‍ സഹോദരങ്ങള്‍ തമ്മിലുണ്ടായ കൈയേറ്റത്തിനൊടുവില്‍ ജ്യേഷ്ഠന് എയര്‍ഗണ്‍ ഉപയോഗിച്ചുള്ള വെടിയേറ്റു. നെടുങ്കണ്ടയിലാണ് സംഭവം. രാജാക്കാട് കുരിശുപാറ കൂനംമാക്കല്‍ സിബിയ്ക്കാണ് (49) വെടിയേറ്റത്. സംഭവവുമായി ബന്ധപ്പെട്ട് ഇളയ സഹോദരന്‍ സാന്റോയെ (38) പൊലീസ് അന്വേഷിക്കുകയാണ്. കഴിഞ്ഞ ദിവസം വൈകിട്ട് ഏഴരയോടെയായിരുന്നു സംഭവം. സിബി കുരിശുപാറയിലാണ് താമസിക്കുന്നത്. സാന്റോയുടെ വീടിനു സമീപം സിബിയുടെ ഉടമസ്ഥതയില്‍ ഏലാതോട്ടമുണ്ട്. കഴിഞ്ഞ ദിവസം സിബിയും ഒരു സഹായിയും തോട്ടത്തിലെത്തിയശേഷം സാന്റോയോടൊപ്പം മദ്യപിച്ചു. ഇതിനിടെ സാന്റോ മറ്റൊരു സുഹൃത്തിനെ വിളിച്ചു വരുത്തിയത് സിബിക്ക് ഇഷ്ടമായില്ല. തുടര്‍ന്നാണ് സഹോദരങ്ങള്‍ തമ്മില്‍ തര്‍ക്കമുണ്ടായത്. തര്‍ക്കത്തിനൊടുവില്‍ ഉടുമ്പന്‍ചോല പൊലീസ് സ്റ്റേഷനിലെത്തിയ സിബി സഹോദരനുമായി പ്രശ്‌നമുണ്ടായ കാര്യം പൊലീസിനെ അറിയിച്ചു. സിബി മദ്യപിച്ചിരുന്നതിനാല്‍ പൊലീസ് കാര്യങ്ങള്‍ പറഞ്ഞ് സമാധാനിപ്പിച്ച് പറഞ്ഞയയ്ക്കുകയായിരുന്നു. സഹോദരന്റെ വീട്ടില്‍ തിരിച്ചെത്തിയ ഉടന്‍ ഇരുവരും തമ്മില്‍ വീണ്ടും വാക്കുതര്‍ക്കമുണ്ടാവുകയും തുടര്‍ന്ന് സാന്റോ എയര്‍ഗണ്ണെടുത്ത് വെടിയുതിര്‍ക്കുകയായിരുന്നു. സാന്റോയ്‌ക്കെതിരെ വധ ശ്രമത്തിന് കേസെടുത്തതായും പ്രതിയെ ഉടന്‍ പിടികൂടുമെന്നും ഉടുമ്പന്‍ചോല സി.ഐ ഫിലിപ് സാം അറിയിച്ചു. സിബി അപകട നില തരണം ചെയ്തിട്ടുണ്ടെന്ന് ഡോക്ടര്‍മാര്‍ അറിയിച്ചു.