‘മാധ്യമ വാര്‍ത്തകള്‍ അധാരമാക്കി കീഴ് ജീവനക്കാര്‍ക്കെതിരെ നടപടിയെടുക്കരുത്’; ജില്ലാ മേധാവിമാര്‍ക്ക് ഡിജിപിയുടെ നിര്‍ദേശം

മാധ്യമ വാര്‍ത്തകള്‍ അധാരമാക്കി കീഴ് ജീവനക്കാര്‍ക്കെതിരെ അച്ചടക്ക നടപടിയെടുക്കരുതെന്ന് ജില്ലാ പൊലീസ് മേധാവിമാര്‍ക്ക് നിര്‍ദേശം നല്‍കി ഡിജിപി അനില്‍ കാന്ത്. മുന്‍പും ഇത് സംബന്ധിച്ച് നല്‍കിയ നിര്‍ദേശങ്ങള്‍ പാലിക്കുന്നില്ലെന്നും അനില്‍ കാന്ത് ചൂണ്ടിക്കാട്ടി. മാധ്യമങ്ങളില്‍ വന്ന ആരോപണങ്ങള്‍ ശരിയാണെന്ന് പ്രാഥമിക അന്വേഷണത്തില്‍ തെളിയാതെ പൊലീസുകാര്‍ക്കെതിരെ അച്ചടക്ക നടപടി സ്വീകരിക്കരുതെന്നാണ് ഡിജിപി നല്‍കിയ നിര്‍ദേശം. ക്രമസമാധാനപാലനത്തിനിടെ പൊലീസ് നടപടിയില്‍ പ്രകോപിതരായ കുറ്റക്കാര്‍ ഓണ്‍ലൈന്‍ മാധ്യമങ്ങളിലെ സ്വാധീനം ഉപയോഗിച്ച് പൊലീസുകാര്‍ക്കെതിരെ തെറ്റായ വാര്‍ത്തകള്‍ പടച്ചുവടുന്നുണ്ടെന്നും ഇതിന്റെ അടിസ്ഥാനത്തില്‍ അച്ചടക്ക നടപടിക്ക് ഇരയാവുന്നുവെന്ന പൊലീസ് ഉദ്യോഗസ്ഥരുടെ പരാതിയെ തുടര്‍ന്നാണ് ഡിജിപിയുടെ ഇടപെടല്‍. ' ചില സന്ദര്‍ഭങ്ങളില്‍ ജനരോഷം കണക്കിലെടുത്താണ് നടപടിയുണ്ടാകുന്നത്. ഇത്തരം സന്ദര്‍ഭങ്ങളില്‍ ശരിയായ നടപടിക്രമങ്ങളോ, അന്വേഷണങ്ങളോ ഉണ്ടാകാറില്ല. പ്രാഥമിക അന്വേഷണത്തില്‍ കുറ്റം തെളിഞ്ഞാല്‍ ചട്ടപ്രകാരം നടപടി എടുക്കണം'- അനില്‍ കാന്ത് വ്യക്തമാക്കി. പൊലീസ് സേനയില്‍ അച്ചടക്ക നടപടി നേരിടുന്ന ഉദ്യോഗസ്ഥനെ സ്ഥാനക്കയറ്റത്തിന് പരിഗണിക്കാറില്ല. ക്രമക്കേട് നടത്തിയ ഉദ്യോഗസ്ഥനെ ക്രിമിനലായി പരിഗണിക്കില്ലെങ്കിലും, പല ശിക്ഷാ മുറകളും സേനയ്ക്കുള്ളില്‍ തന്നെ ലഭിക്കാറുണ്ട്. ഫൈന്‍, അധിക ഡ്യൂട്ടി, ഡ്രില്‍, കഠിനമായ ട്രെയ്നിങ്ങുകള്‍, നാശനഷ്ടങ്ങള്‍ക്കുള്ള തുക ശമ്പളത്തില്‍ നിന്ന് ഈടാക്കുക തുടങ്ങി നിരവധി ശിക്ഷാ മുറകളുണ്ട്.