സൈബര്‍ വിദഗ്ധന്‍ സായ് ശങ്കറിനെതിരെ തട്ടിപ്പുകേസും; 45 ലക്ഷം തട്ടിയെന്ന് പരാതി

കോഴിക്കോട് നടിയെ പീഡിപ്പിച്ച കേസ് അന്വേഷിക്കുന്ന ഉദ്യോഗസ്ഥരെ വകവരുത്താന്‍ ഗൂഢാലോചന നടത്തിയെന്ന കേസിലെ തെളിവു നശിപ്പിച്ച സംഭവത്തില്‍, അന്വേഷണം നേരിടുന്ന സൈബര്‍ വിദഗ്ധന്‍ എരൂര്‍ പിഷാരികോവില്‍ ശ്രീദുര്‍ഗയില്‍ സായ്ശങ്കറിനെതിരെ തട്ടിപ്പു കേസും. ഇലക്ട്രോണിക് ഉപകരണങ്ങള്‍ വാങ്ങി നല്‍കാമെന്ന് പറഞ്ഞ് 45 ലക്ഷം തട്ടിയെന്നാണ് പരാതി. കോഴിക്കോട് സ്വദേശി മിന്‍ഹാജ് ആണ് പരാതിക്കാരന്‍. പരാതിയുടെ അടിസ്ഥാനത്തില്‍ നടക്കാവ് പൊലീസ് സായ്ശങ്കറിനെതിരെ വഞ്ചനാകുറ്റത്തിനു കേസെടുത്തു. ഡിആര്‍ഐ റെയ്ഡിലൂടെ പിടിച്ചെടുക്കുന്ന ഇലക്ട്രോണിക് ഉപകരണങ്ങള്‍ ലേലം ചെയ്യുന്നുണ്ടെന്നും അത് കുറഞ്ഞ തുകയ്ക്ക് വാങ്ങി നല്‍കാമെന്നും പറഞ്ഞ് സായ്ശങ്കര്‍ 45 ലക്ഷം രൂപ തട്ടിയെടുത്തെന്നാണ് പരാതി. 2019-20 വര്‍ഷങ്ങളിലാണ് പണം തട്ടിയെടുത്തത്. കൊയിലാണ്ടി സ്വദേശി ഉള്‍പ്പെടെ മറ്റു മൂന്നുപേരില്‍നിന്നും ഇതേപേരില്‍ പണം തട്ടിയെടുത്തെന്നും മിന്‍ഹാജിന്റെ പരാതിയില്‍ പറയുന്നു. 2020 സെപ്റ്റംബറില്‍ മിന്‍ഹാജ് ഇതേ പരാതി നല്‍കിയിരുന്നു. എന്നാല്‍, അന്ന് തെളിവുകളൊന്നും ഹാജരാക്കിയില്ല. അതിനാല്‍ അന്ന് പൊലീസ് കേസെടുത്തില്ല. നടന്‍ ദിലീപ് കേസുമായി ബന്ധപ്പെട്ട് സായ്ശങ്കറിനെതിരെ ക്രൈംബ്രാഞ്ച് നടപടി തുടങ്ങിയ സാഹചര്യത്തിലാണ് വീണ്ടും പരാതി നല്‍കിയത്. ഇപ്പോള്‍ തെളിവു ഹാജരാക്കിയിട്ടില്ലെന്നും ഉടന്‍ ഹാജരാക്കുമെന്നും മിന്‍ഹാജ് പറഞ്ഞു.