ഇവിടെയുണ്ട്, തൂക്കുമരത്തില്‍ പതറാത്ത ധീരര്‍

കരിവെള്ളൂര്‍: 1943 മാര്‍ച്ച് 29ന് പുലര്‍ച്ചെ കണ്ണൂര്‍ സെന്‍ട്രല്‍ ജയില്‍ ഭിത്തികളെ വിറപ്പിച്ച അത്യുച്ചത്തിലുള്ള 'ഇന്‍ക്വിലാബ് സിന്ദാബാദ്' വിളികള്‍ ഈ ഇന്‍സ്റ്റലേഷന്‍ കണ്ടാല്‍ എല്ലാവരുടെയും മനസില്‍ മുഴങ്ങും. ഒരടിപോലും പതറാതെ, ഒരുതുള്ളി കണ്ണീര്‍ പൊഴിക്കാതെ രക്തസാക്ഷിത്വം വരിച്ച കയ്യൂര്‍ സഖാക്കളുടെ മുഷ്ടി ചുരുട്ടിയുള്ള അവസാനത്തെ ഇന്‍ക്വിലാബ് വിളി ദൃശ്യവല്‍ക്കരിക്കുന്നത് പ്രശസ്ത ചിത്രകാരന്‍ ബാലന്‍ പാലായിയാണ്. കേരള ചരിത്രത്തില്‍ ആദ്യമായി രാഷ്ട്രീയപരമായ കാരണങ്ങളാല്‍ നാല് കമ്യണിസ്റ്റ് -കര്‍ഷകസംഘം പ്രവര്‍ത്തകര്‍ തൂക്കിലേറ്റപ്പെട്ടതും ജന്മിത്വത്തിന്റെ കൊടിയ ചൂഷണത്തിനെതിരെ, അവരുടെ മര്‍ദ്ദനങ്ങളെയും പീഡനങ്ങളെയും ഏറ്റുവാങ്ങി പോരാട്ടം നയിച്ച കയ്യൂര്‍ ഗ്രാമത്തെയും ഇന്‍സ്റ്റലേഷനില്‍ വരച്ചുകാട്ടുകയാണിവിടെ പാര്‍ടി കോണ്‍ഗ്രസിന്റെ ഭാഗമായുള്ള ചിത്ര- ശില്‍പ്പ പ്രദര്‍ശന നഗരിയിലേക്കാണ് ഇന്‍സ്റ്റലേഷന്‍ ഒരുങ്ങുന്നത്. ഫൈബര്‍, തുണി, ചാക്ക്, മെറ്റല്‍ ഫ്രെയിം, ഹോം ബോര്‍ഡ് എന്നിവ ഉപയോഗിച്ചാണ് നിര്‍മാണം. സന്തോഷ് കമ്പല്ലൂര്‍, രതീഷ് രാമന്‍, ഷീന്‍, പ്രണവ്, ധനരാജ് മാണിയാട്ട് എന്നിവര്‍ സഹായികളായി. സിപിഎം കേന്ദ്ര കമ്മിറ്റിയംഗം ഇ പി ജയരാജന്‍, ജില്ലാ സെക്രട്ടറി എം.വി. ജയരാജന്‍ എന്നിവര്‍ കരിവെള്ളൂരിലെ പണിപ്പുരയിലെത്തി നിര്‍മാണം വിലയിരുത്തി.