ഇടപ്പള്ളിയില്‍ വീട്ടുവേലയ്ക്കു നിന്ന പെണ്‍കുട്ടി നേരിട്ടത് ക്രൂര പീഡനം; വീട്ടുടമ അറസ്റ്റില്‍, ഭാര്യ ഒളിവില്‍

കൊച്ചി ഇടപ്പള്ളിയില്‍ വേലയ്ക്കു നിന്ന പെണ്‍കുട്ടി വീട്ടുടമസ്ഥരില്‍ നിന്ന് അനുഭവിച്ചത് സമാനതയില്ലാത്ത പീഡനം. കര്‍ണാടക സ്വദേശിനിയായ ഈ പെണ്‍കുട്ടി വേലയ്ക്കു നിന്ന വീട്ടിന്റെ അയല്‍വീട്ടില്‍ എത്തി കഴിഞ്ഞയാഴ്ച പരാതിപ്പെട്ടതോടെയാണ് പീഡനകഥകള്‍ പുറത്തുവന്നത്. വീട്ടുകാരില്‍ നിന്ന് അടിയേറ്റു മൂക്കില്‍ ചോരയൊലിപ്പിച്ച നിലയിലാണ് പെണ്‍കുട്ടി അടുത്ത വീട്ടില്‍ എത്തിയത്. നാട്ടുകാര്‍ നല്‍കിയ പരാതിയില്‍ പെണ്‍കുട്ടിയുടെ മൊഴിയെടുത്ത പൊലീസ് പെണ്‍കുട്ടി വേലയ്ക്കു നിന്ന വീട്ടുടമസ്ഥന്‍ പവോത്തിത്തറ പോളിനെ പോക്‌സോ കേസ് ചുമത്തി അറസ്റ്റു ചെയ്തു. പോളിന്റെ ഭാര്യയും ഇടപ്പള്ളി വനിതാ ക്ഷേമ സമിതി അധ്യക്ഷയുമായ സെലിന്‍ പോള്‍ ഒളിവിലാണ്. 14 വയസ്സ് മുതല്‍ ഇടപ്പള്ളിയില്‍ ജോലിക്ക് നിന്നതായി പെണ്‍കുട്ടി പറഞ്ഞു. 2015 നവംബര്‍ 16 നാണ് കര്‍ണാടക സ്വദേശിനിയെ സെലിന്‍ വീട്ടുവേലയ്ക്കായി കൊണ്ടുവന്നത്. മാതാവു മരിച്ച പെണ്‍കുട്ടിയെ രണ്ടാനമ്മയും അച്ഛനും ചേര്‍ന്ന് വില്‍ക്കുകയായിരുന്നു എന്നും സൂചനയുണ്ട്. അമ്മയെ അച്ഛന്‍ ചവിട്ടി കൊന്നതു തന്റെ കണ്‍മുന്നില്‍ വച്ചായിരുന്നു എന്നും പെണ്‍കുട്ടി പറഞ്ഞു. ''വീട്ടിലെ എല്ലാ ജോലിയും ചെയ്യണം. ഇതിനു പുറമേ ലൈംഗിക പീഡനത്തിനും ഇരയായി.'' സെലിനോട് ഇക്കാര്യത്തില്‍ പരാതി പറഞ്ഞപ്പോള്‍ 'നിന്റെ കുഴപ്പം കൊണ്ടാണ്' എന്നു പറഞ്ഞതായാണ് പെണ്‍കുട്ടി പൊലീസിനു നല്‍കിയ മൊഴി. ജോലിക്കെത്തിയ കാലം മുതല്‍ പോള്‍ ലൈംഗികമായി ദുരുപയോഗം ചെയ്തതായാണ് പെണ്‍കുട്ടിയുടെ മൊഴി. ഇതേത്തുടര്‍ന്നാണ് പൊലീസ് പോളിനെ അറസ്റ്റു ചെയ്തത്. പോള്‍ വീടിനോട് അനുബന്ധമായി കാറ്ററിങ് ബിസിനസ് നടത്തിയിരുന്നു. അവിടെ ഭക്ഷണം വിതരണം ചെയ്യുന്നതു മുതല്‍ മരത്തില്‍ കയറുന്നതിനു വരെ ഈ പെണ്‍കുട്ടിയെ ഉപയോഗിച്ചതായാണ് ആരോപണം. പോളിന്റെ മകളുടെ വീട്ടിലും പെണ്‍കുട്ടിയെ ജോലിക്കു വേണ്ടി ഉപയോഗിച്ചു. നാട്ടുകാരോടു പരാതി പറഞ്ഞിട്ടും ആരും പൊലീസില്‍ അറിയിക്കാനോ പെണ്‍കുട്ടിയെ രക്ഷപെടുത്താനോ ശ്രമിച്ചില്ല. ഇതിനിടെ പല തവണ രക്ഷപ്പെടാന്‍ ശ്രമിച്ചെങ്കിലും ഫലമുണ്ടായില്ല. പെണ്‍കുട്ടിയുടെ പേരില്‍ ആധാര്‍ കാര്‍ഡില്ലെന്നാണ് വിവരം. കോവിഡ് വാക്‌സീന്‍ പോലും എടുത്തിട്ടില്ലെന്നാണ് സമീപവാസികള്‍ പറയുന്നത്. കഴിഞ്ഞ ദിവസം ക്രൂരത സഹിക്കാന്‍ വയ്യാതായതോടെ പെണ്‍കുട്ടി വീട്ടില്‍ നിന്ന് ഇറങ്ങി സമീപത്തെ വീട്ടില്‍ അഭയം പ്രാപിച്ചു. പെണ്‍കുട്ടി വീട്ടില്‍ കയറി വന്ന വിവരം സെലിനെ അറിയിച്ചെങ്കിലും അവിടെയെത്താന്‍ സെലിന്‍ ആദ്യം തയാറായില്ല. ഒടുവില്‍ പൊലീസില്‍ അറിയിക്കുമെന്നു പറഞ്ഞപ്പോഴാണ് വന്നതെന്നു നാട്ടുകാര്‍ പറഞ്ഞു. പലപ്രാവശ്യം അയല്‍വാസികളോടു പരാതിപ്പെട്ടെങ്കിലും പൊലീസില്‍ അറിയിക്കുന്നതിനെയും കേസാകുന്നതിനെയും പെണ്‍കുട്ടി ഭയപ്പെട്ടിരുന്നൂ.ഇതിനിടെ വനിതാ ദിനത്തില്‍ വനിതാ ക്ഷേമ സമിതി നടത്തിയ പരിപാടിയില്‍ ചായ വിതരണത്തിന് എത്തിയപ്പോള്‍ വനിതകളുടെ അവകാശങ്ങളെക്കുറിച്ചു സെലിന്‍ പ്രസംഗിക്കുന്നത് പെണ്‍കുട്ടി കേട്ടു. തനിക്ക് ഇത്രയേറെ അവകാശങ്ങളുണ്ട് എന്ന ബോധ്യത്തില്‍ നിന്നാണ് എല്ലാം തുറന്നു പറയാന്‍ ധൈര്യം വന്നതെന്ന് പെണ്‍കുട്ടി പറഞ്ഞൂ. പെണ്‍കുട്ടിയുടെ മൊഴിയില്‍ പോളിനെ അറസ്റ്റു ചെയ്തു റിമാന്‍ഡ് ചെയ്‌തെങ്കിലും സെലിനെ അറസ്റ്റു ചെയ്തിട്ടില്ല. ഇവര്‍ മുന്‍കൂര്‍ ജാമ്യം തേടി ഹൈക്കോടതിയെ സമീപിച്ചതായാണ് വിവരം.