‘ഹെലികോപ്റ്ററിന് വാഹനപൂജ’; ഗുരുവായൂരിന്റെ ചരിത്രത്തില്‍ ഇതൊരു അപൂര്‍വ്വ കാഴ്ച

ഗുരുവായൂര്‍: പ്രമുഖ വ്യവസായിയും ആര്‍.പി.ഗ്രൂപ്പ് ചെയര്‍മാനുമായ രവി പിള്ളയുടെ അത്യാധുനിക ഹെലികോപ്റ്ററിന് ഗുരുവായൂരില്‍ പ്രത്യേക പൂജ നടത്തി.ഗുരുവായൂര്‍ ശ്രീകൃഷ്ണ കോളജിലെ ഹെലിപ്പാടില്‍ ഗുരുവായൂര്‍ ക്ഷേത്രം മുന്‍ മേല്‍ശാന്തി പഴയത്ത് സുമേഷ് നമ്പൂതിരിയാണ് പൂജ നടത്തിയത്. ഗുരുവായൂരപ്പന്റെ വലിയ ഭക്തനായ രവി പിള്ളയും കുടുംബവും ഇന്നലെ ഉച്ചതിരിഞ്ഞാണ് പുതിയ ഹെലികോപ്റ്ററില്‍ ഗുരുവായൂര്‍ ശ്രീകൃഷ്ണ കോളജിലെ ഹെലിപ്പാടില്‍ ഇറങ്ങിയത്. പൂജയ്ക്ക് ശേഷം ഗുരുവായൂരില്‍ തങ്ങിയ രവിപിള്ളയും മകനും കുടുംബവും ഇതേ ഹെലികോപ്റ്ററില്‍ ഇന്ന് രാവിലെ മടങ്ങിപ്പോയി. 100 കോടി വിലയുള്ള എയര്‍ബസ് കമ്പനിയുടെ അത്യാധുനികവും ആഡംബര സൗകര്യങ്ങളുമുള്ള എച്ച് 145 ചോപ്പര്‍ എയര്‍ബസ് ആണ് രവിപിള്ള സ്വന്തമാക്കിയിട്ടുള്ളത്. ഇന്ത്യയില്‍ ഈ ഹെലികോപ്റ്റര്‍ സ്വന്തമാക്കുന്ന ആദ്യ വ്യക്തിയാണ് രവിപിള്ള. കൊല്ലത്ത് ഉപാസന ആശുപത്രിയുടെ 50ാം വാര്‍ഷികാഘോഷത്തിനെത്തിയ സൂപ്പര്‍സ്റ്റാര്‍ മോഹന്‍ലാല്‍ എത്തിയത് ഈ ആഡംബര ഹെലികോപ്റ്ററിലായിരുന്നു. അഷ്ടമുടികായല്‍ തീരത്തെ ഹെലിപ്പാടിലാണ് എച്ച് 145 എയര്‍ ബസ് പറന്നിറങ്ങിയത്. ആര്‍ പി ഫൗണ്ടേഷന്റെ ഉടമസ്ഥതയിലെ കൊല്ലം ഉപാസന ആശുപത്രിയുടെ 50-ാം വാര്‍ഷികാഘോഷം ഉദ്ഘാടന ചടങ്ങ് കേക്ക് മുറിച്ച് തുടക്കം കുറിച്ചാണ് മോഹന്‍ലാല്‍ മടങ്ങിയത്. മോഹന്‍ലാലും നിര്‍മ്മാതാവ് ആന്റണി പെരുമ്പാവൂരും ഹെലികോപ്റ്ററില്‍ വന്നിറങ്ങുന്ന ദൃശ്യങ്ങള്‍ വൈറലായതോടെ സമൂഹമാധ്യമങ്ങളില്‍ ഈ ഹെലികോപ്റ്റര്‍ താരമായി മാറിയിരുന്നു. എയര്‍ബസ് നിര്‍മിച്ച ഹെലികോപ്റ്റര്‍ ആദ്യമായാണ് ഇന്ത്യയില്‍ ഒരാള്‍ വാങ്ങുന്നത്. ലോകത്താകെ 1500 എയര്‍ബസ് എച്ച് 145 ഹെലികോപ്റ്ററുകള്‍ മാത്രമാണുള്ളത്. കടല്‍ നിരപ്പില്‍ നിന്ന് 20000 അടി ഉയരത്തിലുള്ള പ്രതലങ്ങളില്‍ പോലും അനായാസമായി ഇറങ്ങാനും പറന്നുയരാനും കഴിയും എന്നതാണ് എച്ച്145ന്റെ പ്രധാന സവിശേഷത. പൈലറ്റിനെ കൂടാതെ 7 പേര്‍ക്കാണ് ഇതില്‍ യാത്ര ചെയ്യാനാവുക. അപകടത്തില്‍പെട്ടാലും യാത്രക്കാരുടെ സുരക്ഷ ഉറപ്പാക്കുന്ന എനര്‍ജി അബ്‌സോര്‍ബിങ് സീറ്റുകള്‍ അടക്കമുള്ളവയാണ് ഇവ. അപകടം സംഭവിച്ചാല്‍ ഹെലികോപ്ടറില്‍ നിന്ന് ഇന്ധനം ചോരുന്നതിനുള്ള സാധ്യതയും വളരെ കുറവാണ്. പറക്കുന്നതിനിടെ ഗ്രൗണ്ട് സ്റ്റേഷനുകളുമായി ഏറ്റവും മികച്ച രീതിയില്‍ ആശയവിനിമയം നടത്താനുള്ള വയര്‍ലെസ് കമ്യൂണിക്കേഷന്‍ സിസ്റ്റവും ഈ ഹെലികോപ്റ്ററിലുണ്ട്.