നടിയെ പീഡിപ്പിച്ച കേസ്: നടന്‍ ദിലീപിനെ ഇന്ന് ചോദ്യം ചെയ്യും

നടിയെ പീഡിപ്പിച്ച കേസിലെ പുനരന്വേഷണത്തിന്റെ ഭാഗമായി നടന്‍ ദിലീപിനെ ഇന്ന് ക്രൈംബ്രാഞ്ച് ആലുവ പൊലീസ് ക്ലബ്ബില്‍ ചോദ്യം ചെയ്യും. നടിയെ പീഡിപ്പിച്ചപ്പോള്‍ പകര്‍ത്തിയ ദൃശ്യങ്ങള്‍ ദിലീപ് കണ്ടതായും കേസിലെ സാക്ഷികളെ സ്വാധീനിച്ചതായും സംവിധായകന്‍ പി.ബാലചന്ദ്രകുമാര്‍ നടത്തിയ വെളിപ്പെടുത്തലാണു പുനരന്വേഷണത്തിനു വഴി തെളിച്ചത്. കേസില്‍ എട്ടാം പ്രതിയാണു ദിലീപ്. ബാലചന്ദ്രകുമാറിന്റെ വെളിപ്പെടുത്തലിന്റെയും കേസ് അന്വേഷിച്ച ഉദ്യോഗസ്ഥരെ അപായപ്പെടുത്താന്‍ ശ്രമിച്ചു എന്ന കേസിന്റെയും ഭാഗമായി ദിലീപ് അടക്കം 7 പേരുടെ ഫോണുകള്‍ പരിശോധിച്ചിരുന്നു. ഇതില്‍ നിന്നു ലഭിച്ച തെളിവുകളുടെ അടിസ്ഥാനത്തിലായിരിക്കും ചോദ്യം ചെയ്യല്‍. ഫോണുകളില്‍ നിന്നു നശിപ്പിച്ചതായി കണ്ടെത്തിയ പല വാട്‌സാപ് ചാറ്റുകളും വോയ്‌സ് മെസേജുകളും ഫൊറന്‍സിക് വിദഗ്ധരുടെ സഹായത്താല്‍ വീണ്ടെടുത്തു. ബാലചന്ദ്രകുമാര്‍ പൊലീസിനു കൈമാറിയ വിഡിയോ, ഓഡിയോ തെളിവുകള്‍, ദിലീപ് മുംബൈയിലെ ലാബില്‍ നിന്നു മായ്ച്ച 2 ഫോണുകളിലെ വിവരങ്ങള്‍, ഹാക്കര്‍ സായ്ശങ്കര്‍ വിവരങ്ങള്‍ നശിപ്പിച്ച നശിപ്പിച്ച ഫോണുകളില്‍ നിന്നു വീണ്ടെടുത്ത തെളിവുകള്‍, സായ്ശങ്കര്‍ അന്വേഷണ സംഘത്തിനു കൈമാറിയ വിവരങ്ങള്‍ തുടങ്ങി ഒട്ടേറെ തെളിവുകളുടെ അടിസ്ഥാനത്തിലായിരിക്കും ചോദ്യം ചെയ്യല്‍.