പ്രണയനൈരാശ്യത്തില്‍ ജീവനൊടുക്കിയ യുവാവ് ലക്ഷ്യമിട്ടത് കൂട്ടക്കൊല; ഒഴിവായത് വന്‍ദുരന്തം

കോഴിക്കോട് : നാദാപുരത്തിനടുത്ത് ജ്യാതിയേരിയില്‍ പ്രണയ നൈരാശ്യത്തെ തുടര്‍ന്ന് യുവാവ് ജീവനൊടുക്കിയ സംഭവത്തില്‍ നാട്ടുകാര്‍ പറയുന്നത് ഞെട്ടിപ്പിക്കുന്ന വിവരങ്ങള്‍.കൊടുവാളും തീപന്തവും പെട്രോളുമായി എത്തിയ യുവാവ് ലക്ഷ്യമിട്ടത് കൂട്ടക്കൊലയായിരുന്നുവെന്നും സഹോദരന്റെയും അയല്‍വാസികളുടെയും സമയോചിതമായ ഇടപെടല്‍ കാരണമാണ് വന്‍ദുരന്തം ഒഴിവായതെന്നും അയല്‍വാസിയായ കുനിയില്‍ കണ്ണന്‍ പറഞ്ഞു. ഇന്ന് പുലര്‍ച്ചെ ഒരു മണിയോടെയാണ് ജ്യാതിയേരി കല്ലുമ്മലിലെ യുവതിയുടെ വീട്ടിലെത്തി പൊന്‍പറ്റ രത്‌നേഷ് (42 ) തീകൊളുത്തി മരിച്ചത്. കുനിയില്‍ കണ്ണന്റെ ഇരുനില കോണ്‍ക്രീറ്റ് വീടിന്റെ മുകളിലേക്ക് കോണി ഉപയോഗിച്ച് കേറി വാതില്‍ കൊടുവാള്‍ ഉപയോഗിച്ച് കുത്തി പൊളിക്കുകയായിരുന്നു.ശബ്ദം കേട്ടുണര്‍ന്ന യുവതിയുടെ സഹോദരന്‍ ഷൈനേഷ് രത്‌നേഷിനെ തടയുകയായിരുന്നു. ഇതിനിടയില്‍ ഷൈനേഷിന്റെ കൈയ്ക്ക് കുത്തേറ്റതായും സംഭവ സമയത്ത് ഓടി കൂടിയ നാട്ടുകാര്‍ പറഞ്ഞു. വീടിന്റെ മുകളിലത്തെ മുറിയുടെ തറയിലേക്ക് പെട്രോള്‍ ഒഴിച്ച് തീകൊളുത്തി. ഈ സമയത്ത് സ്ത്രീകളും കുട്ടികളും മുകളില്‍ ഉണ്ടായിരുന്നു. സാഹസികമായാണ് ഇവരെ നാട്ടുകാര്‍ രക്ഷപെടുത്തിയത്. ഇതിനിടയില്‍ പുറത്തേക്ക് വന്ന രത്‌നേഷ് പെട്രോള്‍ കുടിച്ച ശേഷം സ്വയം തീകൊളുത്തുകയായിരുന്നുവെന്നും ദൃക്സാക്ഷികള്‍ പറഞ്ഞു.വീടിന്റെ ഗേറ്റിന് സമീപമാണ് രത്‌നേഷിന്റെ മൃതദേഹം കിടന്നിരുന്നത്. സംഭവത്തില്‍ വീട്ടുകാര്‍ക്ക് പൊള്ളലേറ്റു. പരിക്ക് സാരമുള്ളതല്ല. ഇവരെ ഉള്ളിയേരി മലബാര്‍ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.നാദാപുരം ഡിവൈഎസ്പി ടി.പി.ജേക്കബ്, വളയം സിഐ എ.അജിഷ് എന്നിവര്‍ സ്ഥലത്തെത്തി. കണ്ണൂര്‍ ജില്ലയിലെ യുവാവുമായി ഏപ്രില്‍ നാലിന് യുവതിയുടെ വിവാഹം നിശ്ചയിച്ചതായിരുന്നു. രത് നേഷിന്റെ മൃതദേഹം ജില്ലാ ആശുപത്രി മോര്‍ച്ചറിയിലേക്കു മാറ്റി.