പാര്‍ട്ടി കോണ്‍ഗ്രസിന് നാടാകെ ചെങ്കൊടി ഉയര്‍ന്നു

കണ്ണൂര്‍: സിപിഎം 23-ാം പാര്‍ട്ടി കോണ്‍ഗ്രസ് പതാകദിനത്തിന്റെ ഭാഗമായി നാടാകെ ചെങ്കൊടി ഉയര്‍ന്നു. കയ്യൂര്‍ രക്തസാക്ഷി ദിനമായ ചൊവ്വാഴ്ച പ്രഭാതഭേരിയോടെ പാര്‍ട്ടി ഓഫീസുകളിലും ബ്രാഞ്ചുകളിലും പാര്‍ടി അംഗങ്ങളുടെയും അനുഭാവികളുടെയും വീടുകളിലും പതാക ഉയര്‍ത്തി. കണ്ണൂരിലെ പാര്‍ട്ടി കോണ്‍ഗ്രസ് സംഘാടക സമിതി ഓഫീസിലും കണ്ണൂര്‍ ജില്ലാ കമ്മിറ്റി ഓഫീസായ അഴീക്കോടന്‍ മന്ദിരത്തിലും 18 ഏരിയാ കമ്മിറ്റി ഓഫീസുകളിലും 243 ലോക്കല്‍ കമ്മിറ്റി ഓഫീസുകളിലും 4,247 ബ്രാഞ്ചുകളിലും 61,688 പാര്‍ടി അംഗങ്ങളുടെയും അനുഭാവികളുടെയും വീടുകളിലുമാണ് ചെമ്പതാക ഉയര്‍ന്നത്. പാര്‍ട്ടി സംസ്ഥാന സെക്രട്ടറിയും പൊളിറ്റ്ബ്യൂറോ അംഗവുമായ കോടിയേരി ബാലകൃഷ്ണന്‍ കോടിയേരി മൂളിയില്‍നട ബ്രാഞ്ചിലും സംഘാടക സമിതി ഓഫീസില്‍ കേന്ദ്ര കമ്മിറ്റി അംഗം ഇ.പി. ജയരാജനും കേന്ദ്രകമ്മിറ്റി അംഗങ്ങളായ പി.കെ. ശ്രീമതി അതിയടത്തെ വീട്ടിലും കെ.കെ. ശൈലജ പഴശ്ശി എ ബ്രാഞ്ചിലും ജില്ലാ കമ്മിറ്റി ഓഫീസില്‍ ജില്ലാ സെക്രട്ടറി എം.വി. ജയരാജനും പതാക ഉയര്‍ത്തി.