‘നിങ്ങള്‍ ‘കിങ്പിന്‍’, ജയിലിനേക്കാള്‍ സുരക്ഷിതമായ സ്ഥലമില്ല’; പള്‍സര്‍ സുനിയുടെ ജാമ്യാപേക്ഷ തള്ളി

നടിയെ ആക്രമിച്ച കേസിലെ മുഖ്യപ്രതി പള്‍സര്‍ സുനിയുടെ ജാമ്യാപേക്ഷ ഹൈക്കോടതി തള്ളി. നേരത്തേ ജാമ്യം തള്ളുന്നതിനു ചൂണ്ടിക്കാട്ടിയ അതേ സാഹചര്യം നിലനില്‍ക്കുന്നുണ്ട് എന്നു കാണിച്ചാണ് നടപടി. നിങ്ങള്‍ കേസിലെ 'കിങ്പിന്‍' ആണെന്നു പ്രോസിക്യൂഷനും ഇരയും പറയുന്നു. അതുകൊണ്ടു ജാമ്യം അനുവദിക്കാനാവില്ല. ഈ ഘട്ടത്തില്‍ ജാമ്യം നല്‍കുന്നത് വിവാദമാകുമെന്നും കോടതി പറഞ്ഞു. ജയിലില്‍ സുരക്ഷാ ഭീഷണിയുണ്ടെന്ന് പള്‍സര്‍ സുനി കോടതിയെ അറിയിച്ചു. എന്നാല്‍, ഇത്രയും സുരക്ഷിതമായ മറ്റൊരു സ്ഥലമില്ലെന്നായിരുന്നു കോടതിയുടെ മറുപടി. കേസ് പരിഗണിക്കുമ്പോള്‍ സര്‍ക്കാര്‍ ജാമ്യാപേക്ഷയെ ശക്തമായി എതിര്‍ത്തു. ഒട്ടേറെ കേസുകളില്‍ പ്രതിയാണ് എന്നതും ക്രിമിനല്‍ പശ്ചാത്തലം വ്യക്തമായതും നടിയെ ആക്രമിച്ച കേസില്‍ നേരിട്ട് പങ്കുള്ളതിന് തെളിവുകള്‍ ഉണ്ടെന്നതും ചൂണ്ടിക്കാട്ടിയാണ് നേരത്തേ പള്‍സര്‍ സുനിയുടെ ജാമ്യാപേക്ഷ ഹൈക്കോടതി തള്ളിയത്.