ഫാമിനു ചുറ്റും വൈദ്യുതവേലി; പടിഞ്ഞാറെ കല്ലടയില്‍ വിനോദിന്റെ മരണത്തില്‍ ദുരൂഹത

കൊല്ലം ശാസ്താംകോട്ടയില്‍ മത്സ്യക്കുളത്തില്‍ യുവാവിനെ ഷോക്കേറ്റ് മരിച്ച നിലയില്‍ കണ്ടെത്തിയ സംഭവത്തില്‍ പ്രത്യേക അന്വേഷണ സംഘത്തെ നിയോഗിക്കണമെന്ന് കുടുംബാംഗങ്ങള്‍. ഈ ആവശ്യമുന്നയിച്ച് കുടുംബം മുഖ്യമന്ത്രിക്കും പൊലീസ് മേധാവിക്കും പരാതി നല്‍കി. ഇക്കഴിഞ്ഞ ഞായറാഴ്ച രാവിലെയാണ് പടിഞ്ഞാറെ കല്ലട കാരാളിമുക്ക് കണത്താര്‍കുന്നം ഉത്രം നിവാസില്‍ വിനോദിനെ (40) മത്സ്യക്കുളത്തില്‍ ഷോക്കേറ്റ് മരിച്ച നിലയില്‍ കണ്ടെത്തിയത്. കണത്താര്‍കുന്നത്തു സ്വകാര്യ വ്യക്തിയുടെ മത്സ്യക്കുളത്തില്‍ ജോലിക്കെത്തിയതായിരുന്നു വിനോദ്. ഫാമിനു ചുറ്റുമുള്ള വേലിയില്‍, പുറത്തുനിന്നുള്ള ജീവികളെ തടയാനായി മത്സ്യക്കുളം ഉടമ അനധികൃതമായി വൈദ്യുതി കടത്തിവിട്ടിരുന്നു. വിനോദിന് ഈ വേലിയില്‍നിന്ന് ഷോക്കേറ്റതായിരിക്കാമെന്നാണ് നിഗമനം. എന്നാല്‍ വേലിയും മത്സ്യക്കുളവും തമ്മില്‍ 20 മീറ്ററോളം വ്യത്യാസമുണ്ട്. മൃതദേഹത്തിന് അരഭാഗം വരെ മാത്രമാണ് ചെളി കണ്ടെത്തിയതെന്നും വിനോദിന്റെ മരണത്തില്‍ ദുരൂഹതയുണ്ടെന്നും കുടുംബാംഗങ്ങള്‍ ആരോപിക്കുന്നു. വിശദാംശങ്ങള്‍ അന്വേഷിച്ച് പൊലീസ് സ്റ്റേഷനിലെത്തിയ വിനോദിന്റെ സഹോദരനോട് ഉദ്യോഗസ്ഥര്‍ കയര്‍ത്തു സംസാരിച്ചുവെന്നും കേസ് അട്ടിമറിക്കാന്‍ നീക്കം ഉണ്ടെന്നും ഭാര്യ ശുഭ പറഞ്ഞു. അതേസമയം, പോസ്റ്റ്‌മോര്‍ട്ടം റിപ്പോര്‍ട്ടിന്റെയും ശാസ്ത്രീയ പരിശോധനകളുടെയും അടിസ്ഥാനത്തില്‍ നടപടികള്‍ സ്വീകരിക്കുമെന്നു പൊലീസ് അറിയിച്ചു.