പാര്‍ടി കോണ്‍ഗ്രസ്:പിഴയടക്കാന്‍ നോട്ടീസ് നല്‍കിയെന്ന വാര്‍ത്ത തെറ്റിദ്ധാരണയില്‍നിന്ന്: എം വി ജയരാജന്‍

കണ്ണൂര്‍: നായനാര്‍ അക്കാദമിയിലെ ഹാള്‍ നിര്‍മാണത്തില്‍ സിആര്‍സെഡ് ലംഘനമുണ്ടെന്നും കന്റോണ്‍മെന്റ് അധികൃതര്‍ പിഴയടക്കാന്‍ നോട്ടീസ് നല്‍കിയെന്നുമുള്ള വാര്‍ത്ത തെറ്റിദ്ധാരണയില്‍നിന്നാണെന്ന് സംഘാടകസമിതി ട്രഷറര്‍ എം വി ജയരാജന്‍. വാര്‍ത്താസമ്മേളനത്തില്‍ ഇതേക്കുറിച്ചുള്ള ചോദ്യത്തോടു പ്രതികരിക്കുകയായിരുന്നു അദ്ദേഹം. നോട്ടീസിന് ഒരുമാസം സമയം നല്‍കുകയാണ് ചെയ്തത്. നായനാര്‍ അക്കാദമിയുടെ അനുമതി സംബന്ധിച്ച രേഖകള്‍ കന്റോണ്‍മെന്റിന്റെ പരിഗണനയിലാണ്. കേന്ദ്രസര്‍ക്കാരിനെയും എംപിമാര്‍ സമീപിച്ചിട്ടുണ്ട്. അനുകൂലമായ മറുപടിയാണ് ഇക്കാര്യത്തില്‍ മന്ത്രിയും വകുപ്പുസെക്രട്ടറിയും നല്‍കിയത്. ടെന്‍സൈല്‍ ഉപയോഗിച്ചുള്ള ഹാളാണ് സമ്മേളനത്തിന് ഒരുക്കുന്നത്. സാങ്കേതിക തടസങ്ങള്‍ മാത്രമാണ് ഇക്കാര്യത്തില്‍ കന്റോണ്‍മെന്റ് ഉന്നയിച്ചത്. ഇത് പരിഹരിക്കാനാകുമെന്നും ജയരാജന്‍ പറഞ്ഞു.