ചെമ്പതാകയില്‍ വിരിഞ്ഞ് ദേശീയ പാത

കണ്ണൂര്‍: ജനസാഗരമേന്തിയ ചെമ്പതാകകകളാല്‍ ചരിത്ര വിസ്മയം തീര്‍ത്ത് ദേശീയ പാതയോരം. സിപിഐ എം 23ാം പാര്‍ടി കോണ്‍ഗ്രസിന്റെ വിളംബരവുമായി വെള്ളിയാഴ്ച വൈകീട്ട് നടന്ന റെഡ് ഫ്ളാഗ് ദിനാചരണത്തില്‍ കണ്ണൂര്‍ ജില്ലയിലെ ദേശീയ പാതയാകെ ചെഞ്ചായത്തില്‍ മുങ്ങി. കേരളത്തിലെ ആദ്യ കമ്യൂണിസ്റ്റ് രക്തസാക്ഷികളായ അബുവും ചാത്തുക്കുട്ടിയും ബ്രിട്ടീഷ് പൊലീസിന്റെ വെടിയേറ്റ് മരിച്ചുവീണ തലശേരി ജവഹര്‍ഘട്ട് മുതല്‍ കണ്ണൂര്‍ കാല്‍ടെക്സിലെ എ കെ ജി പ്രതിമവരെ 23 കീലോമീറ്ററാണ് ചെങ്കൊടി മനുഷ്യസാഗരം മാറോട് ചേര്‍ത്ത് നിന്നത്. തുടര്‍ച്ചയായി ചെങ്കൊടി ഉയര്‍ത്തിക്കൊണ്ട് 23ാം കോണ്‍്ഗ്രസിന്റെ സന്ദേശമുയര്‍ത്തി 23 കിലോമീറ്റര്‍ നീണ്ട പതാക പരിപാടി ചരിത്രത്തിലെ ആദ്യസംഭവമെന്ന നിലയില്‍ യൂണിവേഴ്സല്‍ റെക്കോര്‍ഡ് ഫോറ( യുആര്‍എഫ്)ത്തിന്റെ റെക്കോര്‍ഡിനും അര്‍ഹമായി. കരിവെള്ളൂര്‍ രക്തസാക്ഷി സ്മാരകം മുതല്‍ മാഹി പൂഴിത്തലയില്‍ പ്രത്യേകം ഒരുക്കിയ ചെറുകല്ലായി രക്തസാക്ഷി കവാടംവരെ ഇടവിട്ട് 53 പ്രധാന കേന്ദ്രങ്ങളിലും 150 മീറ്റര്‍ വീതം നീളമുള്ള ചെങ്കൊടിയേന്തി ജനങ്ങള്‍ അണിനിരന്നു. തലശ്ശേരിയില്‍ രക്തസാക്ഷി സ്മാരകം മുതല്‍ മാഹി പൂഴിത്തലയില്‍ ചെറുകല്ലായി രക്തസാക്ഷി കവാടംവരെയും ഇടവിട്ട് പ്രധാന കേന്ദ്രങ്ങളില്‍ ജനങ്ങള്‍ ചെങ്കൊടിയേന്തിയപ്പോള്‍ 82 കിലോമീറ്ററിലേറെ ദൈര്‍ഘ്യമായി. തലശ്ശേരി ജവഹര്‍ഘട്ടില്‍ സിപിഐ എം സംസ്ഥാന സെക്രട്ടറി കോടിയേരി ബാലകൃഷ്ണനും ഏകെജി സ്‌ക്വയറില്‍ കേന്ദ്ര കമ്മിറ്റി അംഗങ്ങളായ ഇ പി ജയരാജനും മന്ത്രി എം വി ഗോവിന്ദനും ആദ്യ കണ്ണികളായി. ജില്ലാ സെക്രട്ടറി എം വി ജയരാജന്‍, സംസ്ഥാന കമ്മിറ്റി അംഗം കെ കെ രാഗേഷ്, കെ പി സഹദേവന്‍ തുടങ്ങിയവര്‍ പങ്കെടുത്തു. കേന്ദ്ര കമ്മിറ്റിയംഗങ്ങളായ പി കെ ശ്രീമതി കരിവെള്ളൂരിലും കെ കെ ശൈലജ മാഹിയിലും ആദ്യ കണ്ണികളായി. പാര്‍ടി കോണ്‍ഗ്രസിന്റെ മുന്നോടിയായി ആരംഭിച്ച അന്താരാഷ്ട്ര പുസ്തകോല്‍സവ വേദിയില്‍ യുആര്‍എഫ് ജൂറി അംഗം സുനില്‍ ജോസഫ് ഗിന്നസ് റെക്കോര്‍ഡ് പ്രഖ്യാപിച്ചു. ജില്ലാ സെക്രട്ടറി എം വി ജയരാജന് മെഡലും സര്‍ട്ടിഫിക്കറ്റും കൈമാറി.