മികവുറ്റ സംഘാടനം : പാര്‍ട്ടി കോണ്‍ഗ്രസ് ചരിത്രമായത് ഇങ്ങനെ..

കണ്ണൂര്‍ : ആറുമാസം മുന്‍പ് പാര്‍ട്ടി കോണ്‍ഗ്രസ് പ്രഖ്യാപിച്ചതു മുതല്‍ ഇന്ത്യയിലെ തന്നെ പാര്‍ട്ടിയുടെ ഏറ്റവും കരുത്തേറിയ ഘടകമായ കണ്ണൂര്‍ മഹാസമ്മേളനത്തെ വരവേല്‍ക്കാനുള്ള ഒരുക്കങ്ങള്‍ തുടങ്ങിയിരുന്നു. ഇതിനിടെയില്‍ കൊവിഡ് മഹാമാരിവീണ്ടുമെത്തുമെന്ന ആശങ്ക ശക്തമായിരുന്നുവെങ്കിലും കൃത്യമായ പ്ലാനിങിനും സംഘടനാമികവിനും തടസമായില്ല.പാര്‍ട്ടി ബ്രാഞ്ച് സമ്മേളനം മുതല്‍ ജില്ലാസമ്മേളനംവരെ സമയബന്ധിതമായി നടത്താനും ബ്രാഞ്ച് തലം മുതലുള്ളഘടകങ്ങളെ പാര്‍ട്ടി കോണ്‍ഗ്രസിന് സജ്ജമാക്കാനും ജില്ലാസെക്രട്ടറി എം.വി ജയരാജന്റെ നേതൃത്വത്തിലുള്ള ടീമിന് കഴിഞ്ഞു. കണ്ണൂര്‍ ഇതുവരെ കാണാത്ത വിധത്തില്‍ നാടിളക്കിയുള്ള പ്രചാരണമാണ് പാര്‍ട്ടികോണ്‍ഗ്രസിനായി നടന്നത്. ഹുണ്ടികപിരിവുവഴി നാലുകോടിയിലേറെ പിരിഞ്ഞുകിട്ടിയതും ജനങ്ങള്‍ പാര്‍ട്ടി കോണ്‍ഗ്രസ് ഏറ്റെടുത്തതിനു തെളിവായി നേതൃത്വം കണ്ടു. ബ്രാഞ്ച് മുതല്‍ ലോക്കല്‍, ഏരിയാകമ്മിറ്റികള്‍ ഉയര്‍ത്തിയ സംഘാടകസമിതി ഓഫിസുകളും പ്രചാരണങ്ങളും വ്യത്യസ്തവും വൈവിധ്യവുമായിരുന്നു. കണ്ണൂരിലെ മുക്കിലും മൂലയിലുമുള്ള ഓരോചുമരുകളും കമ്യൂണിസ്റ്റ് പാര്‍ട്ടി കടന്നുവന്ന സഹനവഴികളും നേതാക്കളുടെ ചിത്രവും കൊണ്ടു നിറഞ്ഞു.ചിത്രകാരന്‍മാരുടെയും കലാകാരന്‍മാരുടെയും വന്‍നിര തന്നെയാണ് ഇതിനായിഅണിനിരന്നത്. ഇതോടൊപ്പം അനുബന്ധ പരിപാടികള്‍ കണ്ണൂര്‍ നഗരത്തിലൊതുക്കാതെ വിവിധ സ്ഥലങ്ങളില്‍ നടത്തിയത് കൂടുതല്‍ ജനങ്ങളിലേക്ക് പാര്‍ട്ടി കോണ്‍ഗ്രസിന്റെ പ്രചാരണമെത്തിക്കാന്‍ കഴിഞ്ഞു. പാര്‍ട്ടി ബ്രാഞ്ചുമുതല്‍ പൊളിറ്റ്ബ്യൂറോവരെയുള്ളവരെ ഒരേ കണ്ണിയില്‍ കോര്‍ത്ത് പ്രവര്‍ത്തിക്കാന്‍ കഴിഞ്ഞതിന്റെ മികവാണ് ഇന്നലെ നായനാര്‍ അക്കാദമിയില്‍ തുടങ്ങിയ ഇരുപത്തിമൂന്നാം പാര്‍ട്ടി കോണ്‍ഗ്രസിന്റെ വിജയം.പരമ്പരാഗതരീതികള്‍ വിട്ടു തികച്ചും പ്രൊഫഷനലായ സമീപനമാണ് സംഘാടകത്വത്തിന് പാര്‍ട്ടി നേതൃത്വം സ്വീകരിച്ചത്. പാര്‍ട്ടി കോണ്‍ഗ്രസ് കണ്ണൂരില്‍ നടത്താന്‍ പൊളിറ്റ്ബ്യൂറോ തീരുമാനിച്ചതുമുതല്‍ കോടിയേരിയുടെ നേതൃത്വത്തില്‍ നായനാര്‍ അക്കാദമിയിലെത്തി സ്ഥിതി ഗതികള്‍ വിലയിരുത്തി. പാര്‍ട്ടി കേന്ദ്രകമ്മിറ്റിയംഗമായ ഇ.പി ജയരാജന്‍, ജയിംസ് മാത്യു,ടി.വിരാജേഷ് തുടങ്ങിയ ജില്ലയിലെ നേതാക്കളുടെ വന്‍നിരതന്നെയാണ് പാര്‍ട്ടി കോണ്‍ഗ്രസിന്റെ വിജയത്തിനായി ചിട്ടയായ പ്രവര്‍ത്തനംസംഘടിപ്പിച്ചത്.ഓരോപ്രദേശത്തും അവിടെ വേരുറച്ച കായിക മത്സരങ്ങള്‍ സംഘടിപ്പിക്കുകയും വര്‍ണാഭമായ വിളംബര ജാഥകള്‍ നടത്തുകയും ചെയ്തത് ബഹുജനങ്ങളില്‍ പാര്‍ട്ടി കോണ്‍ഗ്രസ് തരംഗം തന്നെയുണ്ടാക്കി.