കണ്ണൂരില്‍ സുരക്ഷ ശക്തമാക്കി

കണ്ണൂര്‍: സംസ്ഥാന സര്‍ക്കാര്‍ വാര്‍ഷികത്തിന്റെയും സിപിഎം പാര്‍ട്ടി കോണ്‍ഗ്രസിന്റെയും ഭാഗമായി കൂടുതല്‍ ജനങ്ങള്‍ കണ്ണൂരിലെത്തുന്നത് കണക്കിലെടുത്ത് സുരക്ഷ ശക്തമാക്കി. പത്ത് തഹസില്‍ദാര്‍മാരെ എക്സിക്യൂട്ടീവ് മജിസ്ട്രേട്ടുമാരായി നിയമിച്ചു. കൂടുതല്‍ പൊലീസിനെയും വിന്യസിച്ചു. എട്ട് ലക്ഷത്തിലേറെ പേര്‍ നഗരത്തിലെത്തുമെന്നാണ് കണക്ക്. ദേശീയനേതാക്കളുടെ വന്‍ നിരയും സമ്മേളനത്തിനുണ്ട്. തമിഴ്നാട് മുഖ്യമന്ത്രി എം.കെ. സ്റ്റാലിന്‍ നാളെ പാര്‍ട്ടി കോണ്‍ഗ്രസ് സെമിനാറിനെത്തുന്നുണ്ട്. 14 വരെ ഓരോ ദിവസവും രണ്ട് തഹസില്‍ദാര്‍മാര്‍ക്കാണ് ക്രമസമാധാനച്ചുമതല. ഉന്നത പൊലീസ് ഉദ്യോഗസ്ഥരുടെ യോഗം ചേര്‍ന്ന് സുരക്ഷാക്രമീകരണം വിലയിരുത്തി. സമീപ ജില്ലകളില്‍നിന്ന് കൂടുതല്‍ പൊലീസിനെ കണ്ണൂരില്‍ വിന്യസിക്കും. സമാപന സമ്മേളന ദിവസം 1300 പൊലീസുകാരെ സുരക്ഷക്ക് നിയോഗിക്കും. പത്ത് ഡിവൈഎസ്പിമാരും 30 എസ്എച്ച്ഒമാരുമുണ്ടാവും.