പൊലീസ് വേഷത്തില്‍ കവര്‍ച്ച : ഒരാള്‍ കൂടി അറസ്റ്റില്‍

മഞ്ചേരി : പൊലീസ് വേഷത്തിലെത്തി എണ്‍പത് ലക്ഷം രൂപയുടെ കുഴല്‍പണം കവര്‍ന്ന സംഭവത്തില്‍ ഒരാള്‍ കൂടി അറസ്റ്റിലായി. ആലപ്പുഴ കരിയിലകുളങ്ങര ചിറയില്‍ ശ്രീകാന്ത് (27)യാണ് മലപ്പുറം പൊലീസ് ഇന്‍സ്പക്ടര്‍ ജോബി തോമസും സംഘവും ആലപ്പുഴയില്‍ വെച്ച് അറസ്റ്റ് ചെയ്തത്. 2021 നവംബര്‍ 26ന് കോഡൂരിലാണ് കേസിന്നാസ്പദമായ സംഭവം. വ്യാജ നമ്പര്‍പ്ലേറ്റുകള്‍ ഘടിപ്പിച്ച നാല് വാഹനങ്ങളിലായി പൊലീസ് ചമഞ്ഞെത്തിയ സംഘം പരാതിക്കാരനെ പണവും വാഹനവും സഹിതം തട്ടിക്കൊണ്ടുപോയാണ് കൊള്ളയടിച്ചത്. സംഘത്തിലെ എറണാകുളം സ്വദേശികളായ സതീഷ്, ശ്രീജിത്ത്, മലപ്പുറം സ്വദേശികളായ സിറില്‍ മാത്യു, മുസ്തഫ, നൗഷാദ്, ബിജേഷ്, ആലപ്പുഴ സ്വദേശികളായ അജി ജോണ്‍സന്‍, രഞ്ജിത്ത്, വയനാട് സ്വദേശി സുജിത്ത് അടക്കം 12 പേരെ നേരത്തെ പൊലീസ് അറസ്റ്റു ചെയ്തിരുന്നു. അറസ്റ്റിലായ ശ്രീകാന്ത് കരീക്കുളങ്ങര, കായംകുളം സ്റ്റേഷനുകളിലായ വധശ്രമം അടക്കം ആറു കേസുകളില്‍ നിലവില്‍ പ്രതിയാണ്. കോഡുര്‍ സംഭവത്തിന് ശേഷം മൊബൈല്‍ ഓഫ് ചെയ്ത് ഒളിവില്‍ കഴിഞ്ഞു വരികയായിരുന്ന ശ്രീകാന്തിനെ സംബന്ധിച്ച് ജില്ലാ പൊലീസ് മേധാവി സുജിത് ദാസിന് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് അറസ്റ്റ്. പ്രത്യേക അന്വേഷണസംഘാംഗങ്ങളായ എസ് ഐ ഗിരീഷ്, ഐ കെ ദിനേഷ്, പി സലീം, ആര്‍ ഷഹേഷ്, കെ ജസീര്‍, രജീഷ് എന്നിവരടങ്ങിയ സംഘമാണ് പ്രതിയെ പിടികൂടി കേസ് അന്വേഷണം നടത്തുന്നത്. കോടതിയില്‍ പതിനാല് ദിവസത്തേക്ക് റിമാന്റ് ചെയ്ത പ്രതിയെ കൂടുതല്‍ അന്വേഷണത്തിനും തെളിവെടുപ്പിനുമായി കസ്റ്റഡിയില്‍ ആവശ്യപ്പെടുമെന്ന് പൊലീസ് പറഞ്ഞു.