സന്തോഷ് ട്രോഫി : കാണികള്‍ക്ക് യാത്രാ സൗകര്യമൊരുക്കുമെന്ന് മന്ത്രി അബ്ദുറഹ്‌മാന്‍

മഞ്ചേരി : ഈ മാസം നടക്കുന്ന സന്തോഷ് ട്രോഫി മത്സരങ്ങള്‍ കാണാനെത്തുന്നവര്‍ക്ക് പ്രത്യേകം യാത്രാ സൗകര്യമൊരുക്കുമെന്ന് കായിക വകുപ്പു മന്ത്രി വി അബ്ദുറഹിമാന്‍. ഇതിനായി കെ എസ് ആര്‍ ടി സിയുമായി സഹകരിച്ച് പ്രത്യേക സര്‍വ്വീസുകള്‍ നടത്തുമെന്നും അദ്ദേഹം പറഞ്ഞു. മത്സരങ്ങള്‍ നടക്കുന്നത് രാത്രിയായതിനാല്‍ ഫുട്ബോള്‍ പ്രേമികള്‍ക്ക് കളി കഴിഞ്ഞ വീട്ടിലേക്ക് മടങ്ങാന്‍ പ്രയാസമുണ്ടാകാതിരിക്കാനാണ് പ്രത്യേക സൗകര്യമൊരുക്കുന്നത്. നിലമ്പൂര്‍, വണ്ടൂര്‍, തിരൂര്‍, പൊന്നാനി തുടങ്ങിയ സ്ഥലങ്ങളില്‍ നിന്നും പ്രത്യേക സര്‍വീസുണ്ടാകുമെന്നും അദ്ദേഹം കൂട്ടിചേര്‍ത്തു. സന്തോഷ് ട്രോഫി മത്സരം നടക്കുന്ന പ്രധാന വേദിയായ മഞ്ചേരി പയ്യനാട് സ്റ്റേഡിയം ഇന്നലെ രാവിലെ ഒമ്പതു മണിക്ക് സന്ദര്‍ശിച്ച മന്ത്രി സജ്ജീകരണങ്ങള്‍ വിലയിരുത്തി. എ.ഐ.എഫ്.എഫ് കോംപറ്റീഷന്‍ മാനേജര്‍ രാഹുല്‍ പരേശ്വറിനോട് വേദികളുടെ സജ്ജീകരണ പുരോഗതി സംബന്ധിച്ച് മന്ത്രി ആരാഞ്ഞു. സ്റ്റേഡിയത്തില്‍ ഇതുവരെ നടത്തിയ പ്രവര്‍ത്തികളില്‍ തൃപ്തി അറിയിച്ച രാഹുല്‍ പരേശ്വര്‍ സ്റ്റേഡിയം ലോകോത്തര നിലവാരത്തിലേക്ക് ഉയര്‍ന്നതായി അറിയിച്ചു. താരങ്ങള്‍ക്കും ഒഫീഷ്യല്‍സിനും ഒരുക്കിയ താമസ-ഗതാഗത സൗകര്യങ്ങളില്‍ തൃപ്തി അറിയിച്ച അദ്ദേഹം സ്റ്റേഡിയം അന്തര്‍ദേശീയ, ദേശീയ മത്സരങ്ങള്‍ക്ക് അനുയോജ്യമായതായും തുടര്‍ന്നും ഇത്തരം മത്സരങ്ങള്‍ ഇവിടെ സംഘടിപ്പക്കണമെന്നും മന്ത്രിയോട് ആവശ്യപ്പെട്ടു. ഏപ്രില്‍ 16 മുതല്‍ മെയ് രണ്ട് വരെ മഞ്ചേരി പയ്യനാട് സ്റ്റേഡിയം, മലപ്പുറം കോട്ടപ്പടി സ്റ്റേഡിയം എന്നിവിടങ്ങളിലായിയാണ് സന്തോഷ് ട്രോഫി മത്സരങ്ങള്‍ നടക്കുന്നത്. ജില്ലാ സ്പോര്‍ട്സ് കൗണ്‍സില്‍ പ്രസിഡന്റ് എ. ശ്രീകുമാര്‍, ഇവന്റ് കോ-ഓര്‍ഡിനേറ്റര്‍ യു. ഷറഫലി, ഡി.വൈ.എസ്.പി. കെ എം ബിജു, കായിക വകുപ്പ് മന്ത്രിയുടെ പ്രതിനിധികളായ കെ.പി. അനില്‍, പി. ജനാര്‍ദനന്‍, എക്സിക്യൂട്ടീവ് അംഗങ്ങളായ കെ. അബ്ദുല്‍ നാസര്‍, ഹൃഷിക്കേഷ് കുമാര്‍ മറ്റു ജനപ്രതിനിധികള്‍, സംഘാടക സമിതി അംഗങ്ങള്‍, കായിക പ്രേമികള്‍ അനുഗമിച്ചു.