കേസ് അട്ടിമറിക്കാന്‍ ശ്രമിക്കുന്നു; ദിലീപിന്റെ ജാമ്യം റദ്ദാക്കണമെന്ന ആവശ്യവുമായി ക്രൈം ബ്രാഞ്ച്

കൊച്ചി: നടിയെ ആക്രമിച്ച കേസില്‍ നടന്‍ ദിലീപിന്റെ ജാമ്യം റദ്ദാക്കണമെന്ന് ആവശ്യപ്പെട്ട് ക്രൈംബ്രാഞ്ച് വിചാരണ കോടതിയില്‍ അപേക്ഷ നല്‍കി. ജാമ്യ വ്യവസ്ഥകളെല്ലാം ദിലീപ് ലംഘിച്ചുവെന്നാണ് അന്വേഷണ സംഘത്തിന്റെ ആരോപണം. തെളിവ് നശിപ്പിക്കാനും സാക്ഷികളെ സ്വാധീനിക്കാനും ദിലീപ് മുന്നിട്ടിറങ്ങിയെന്നും അപേക്ഷയിലുണ്ട്. അതേ സമയം തുടരന്വേഷണ വിവരങ്ങള്‍ ചോര്‍ത്തി എന്ന പരാതിയില്‍ ക്രൈം ബ്രാഞ്ച് എ.ഡി.ജി.പിയോട് വിചാരണക്കോടതി റിപ്പോര്‍ട്ട് തേടി. അന്വേഷണ ഉദ്യോഗസ്ഥന്‍ ബൈജു പൗലോസ് നല്‍കിയ വിശദീകരണം തൃപ്തികരമല്ലെന്നും കോടതി നിരീക്ഷിച്ചു. 2017 ല്‍ ഹൈക്കോടതിയാണ് നടന്‍ ദിലീപിന് നടിയെ ആക്രമിച്ച കേസില്‍ ജാമ്യം നല്‍കിയത്. ജാമ്യ വ്യവസ്ഥകള്‍ ലംഘിച്ചാല്‍ അന്വേഷണ സംഘത്തിന് വിചാരണ കോടതിയെ സമീപിക്കാമെന്നും ജാമ്യം റദ്ദാക്കാമെന്നും ഹൈക്കോടതി വ്യക്തമാക്കിയിരുന്നു. ഇത് പ്രകാരമമാണ് ഇന്ന് ക്രൈംബ്രാഞ്ച് സംഘം ദിലീപിന്റെ ജാമ്യം റദ്ദാക്കാന്‍ വിചാരണക്കോടതിയോട് ആവശ്യപ്പെട്ടിരിക്കുന്നത്. സാക്ഷികളെ സ്വാധീനിക്കാന്‍ ശ്രമിച്ചു, തെളിവ് നശിപ്പിച്ചു കേസ് അട്ടിമറിക്കാന്‍ ശ്രമിച്ചു എന്നതടക്കം നിരവധി ആരോപണങ്ങളാണ് അന്വേഷണ സംഘം ദിലീപിനെതിരെ ഉയര്‍ത്തുന്നത്. അതിനാല്‍ കേസ് അട്ടിമറിക്കപ്പെടുന്നത് ഒഴിവാക്കാന്‍ ദിലീപിന്റെ ജാമ്യം റദ്ദാക്കണമെന്ന് അന്വേഷണ സംഘം കോടതിയില്‍ ആവശ്യപ്പെട്ടു. സാക്ഷികളെ സ്വാധീനിക്കാന്‍ ശ്രമിച്ചതിന്റെ തെളിവുകള്‍ ഓരോ ദിവസവും പുറത്ത് വരികയാണെന്നും അഭിഭാഷകരെ പോലും ഇതിനായി ഉപയോഗിച്ചെന്നും അന്വേഷണ സംഘം ചൂണ്ടിക്കാട്ടി. നേരത്തെയും ദിലീപിന്റെ ജാമ്യം റദ്ദാക്കണമെന്ന ആവശ്യമുയര്‍ന്നിരുന്നു. നിലവിലെ അപേക്ഷയില്‍ കോടതി എന്ത് തീരുമാനമെടുക്കും എന്നത് കേസില്‍ നിര്‍ണായകമാകും. അതേസമയം കേസിലെ വിവരങ്ങള്‍ മാധ്യമങ്ങള്‍ക്ക് ചോര്‍ത്തി നല്‍കി എന്ന പരാതിയില്‍ അന്വേഷണ ഉദ്യോഗസ്ഥന്‍ ബൈജു പൗലോസ് കോടതിയില്‍ ഹാജരായി. തുടര്‍ന്ന് ബൈജു പൗലോസ് നല്‍കിയ വിശദീകരണം തൃപ്തിരകരമല്ലെന്ന് കോടതി വിലയിരുത്തി. കേസില്‍ തിങ്കളാഴ്ച വൈകുന്നേരം വാദം കേള്‍ക്കുമെന്നും അപ്പോള്‍ ക്രൈംബ്രാഞ്ച് എ.ഡി.ജി.പി കൃത്യമായ വിശദീകരണം നല്‍കുമെന്നും കോടതി വ്യക്തമാക്കി.