അവസാനം എത്തിപ്പോയി; ബി.എസ്.എന്‍.എല്‍. 4ജിയിലേക്ക്

തൃശ്ശൂര്‍: കാത്തിരിപ്പിനൊടുവില്‍ ബി.എസ്.എന്‍.എലിന് 4 ജി കിട്ടുമ്പോള്‍, അത് സാങ്കേതികവിദ്യയില്‍ രാജ്യത്തിന്റെ സ്വയംപര്യാപ്തതയുടെ അടയാളംകൂടിയായിമാറുന്നു. ഇത്രനാളും വിദേശരാജ്യത്തെ ആശ്രയിച്ചിരുന്ന ടെലികോം സാങ്കേതികവിദ്യ ഇന്ത്യക്കും സാധ്യമാണെന്ന് തെളിയുന്നു. ടാറ്റ കണ്‍സള്‍ട്ടന്‍സി സര്‍വീസസ് (ടി.സി.എസ്.) വികസിപ്പിച്ച 4ജി സാങ്കേതികവിദ്യ രാജ്യത്ത് 6000 ടവറുകളിലാണ് ഉടന്‍ നിലവില്‍വരുക. ബി.എസ്.എന്‍.എലും ടി.സി.എസും തമ്മില്‍ ഇതിനുള്ള കരാര്‍ ആയിക്കഴിഞ്ഞു. 547.02 കോടി രൂപയുടെ 4ജി ഉപകരണങ്ങളാണ് ബി.എസ്.എന്‍.എല്‍. വാങ്ങുന്നത്. ചണ്ഡീഗഢില്‍ നടത്തിയ ട്രയലില്‍ വിജയകരമെന്ന് ബോധ്യമായതിനെത്തുടര്‍ന്നാണ് തദ്ദേശീയ സാങ്കേതികവിദ്യയില്‍ പിറന്ന 4ജി സ്വീകരിക്കാന്‍ കേന്ദ്രസര്‍ക്കാര്‍ തയ്യാറായത്. ലോകത്തെ ഏറ്റവും വലിയ ടെലികോം വിപണികളിലൊന്നായ ഇന്ത്യയില്‍ ഇതുവരെ ആധിപത്യം ചൈന, ജപ്പാന്‍, കൊറിയ തുടങ്ങിയ രാജ്യങ്ങളില്‍നിന്നുള്ള കമ്പനികള്‍ക്കായിരുന്നു. ചൈനയുമായി ഉണ്ടായ അതിര്‍ത്തിത്തര്‍ക്കത്തെ തുടര്‍ന്ന് ആ രാജ്യത്തുനിന്നുള്ള ഇടപാടുകള്‍ക്ക് നിരോധനം വന്നു. അപ്പോഴേക്കും 4ജി ടെന്‍ഡര്‍ നടപടികള്‍ അവസാനഘട്ടത്തിലെത്തിയിരുന്നു. തദ്ദേശീയ സാങ്കേതികവിദ്യ മതിയെന്ന തീരുമാനം കേന്ദ്രസര്‍ക്കാരില്‍നിന്നു വന്നതോടെ ടെന്‍ഡര്‍ നടപടികള്‍ റദ്ദാക്കി. രാജ്യത്തുനിന്നുള്ള നാല് കമ്പനികള്‍ 4ജി സാങ്കേതികവിദ്യ തയ്യാറാക്കി മുന്നോട്ടുവന്നു. എന്നാല്‍, ടി.സി.എസിന്റേതാണ് മികവുറ്റതായി തിരഞ്ഞെടുക്കപ്പെട്ടത്.