എറണാകുളം – കായംകുളം പാസഞ്ചര്‍ 25ന് പുനരാരംഭിക്കും

എറണാകുളം-കായംകുളം പാസഞ്ചര്‍ സര്‍വീസ് 25ന് പുനരാരംഭിക്കും. അണ്‍റിസര്‍വ്ഡ് എക്‌സ്പ്രസ് സ്‌പെഷലായി സര്‍വീസ് ആരംഭിക്കുന്ന ട്രെയിന്‍ എല്ലാ ദിവസവും വൈകിട്ട് 6ന് എറണാകുളത്തുനിന്നു പുറപ്പെട്ടു രാത്രി 8.50ന് കായംകുളത്ത് എത്തും. കായംകുളത്തുനിന്നു രാവിലെ 8.50ന് പുറപ്പെട്ടു പകല്‍ 11.30ന് എറണാകുളത്ത് എത്തും. എഴുപുന്ന, തിരുവിഴ, കരുവാറ്റ സ്റ്റേഷനുകളില്‍ ഹാള്‍ട്ട് ഏജന്റുമാരെ നിയമിക്കുന്ന മുറയ്ക്കു സ്റ്റോപ്പ് അനുവദിക്കും. 16 കോച്ചുകളാണു ട്രെയിനിലുണ്ടാകുക. കോവിഡിന്റെ പേരില്‍ നിര്‍ത്തലാക്കിയ സര്‍വീസ് പുനഃസ്ഥാപിക്കണമെന്ന് ആവശ്യപ്പെട്ടു യാത്രക്കാര്‍ ഏറെ നാളായി നിവേദനങ്ങള്‍ നല്‍കി കാത്തിരിക്കുകയായിരുന്നു. വൈകിട്ട് 5.25ന് ജനശതാബ്ദി പോയി കഴിഞ്ഞാല്‍ ആലപ്പുഴ ഭാഗത്തേക്കു എറണാകുളത്തുനിന്നു ട്രെയിനില്ലാത്തതു മൂലം സ്ഥിരം യാത്രക്കാരുള്‍പ്പെടെ വലിയ ദുരിതമാണു നേരിട്ടിരുന്നത്. പാസഞ്ചര്‍ എക്‌സ്പ്രസായി പുനഃസ്ഥാപിക്കുമ്പോള്‍ സീസണ്‍ടിക്കറ്റ് യാത്രക്കാര്‍ക്കു നിരക്കില്‍ വ്യത്യാസമില്ലെങ്കിലും സാധാരണ യാത്രക്കാര്‍ എക്‌സ്പ്രസ് നിരക്കു നല്‍കണം. രാത്രി 8.50ന് കായംകുളത്തു എത്തിച്ചേരുന്നതിനാല്‍ തുടര്‍ യാത്രയ്ക്കു കായംകുളം റെയില്‍വേ സ്റ്റേഷനില്‍നിന്നു കെപി റോഡ് വഴിയും ഓച്ചിറ ഭാഗത്തേക്കും കെഎസ്ആര്‍ടിസി ബസ് സര്‍വീസ് നടത്തണമെന്ന ആവശ്യവും ശക്തമാണ്. കോവിഡിനു മുന്‍പു ബസുകള്‍ സ്റ്റേഷനു മുന്നിലുള്ള ബസ് സ്റ്റാന്‍ഡ് വഴി സര്‍വീസ് നടത്തിയിരുന്നെങ്കിലും ട്രെയിന്‍ സര്‍വീസ് നിര്‍ത്തി വച്ചതോടെ സ്റ്റേഷനില്‍ പോകുന്നുണ്ടായിരുന്നില്ല. സര്‍വീസുകള്‍ പുനരാരംഭിച്ച ഘട്ടത്തില്‍ ബസുകള്‍ പഴയ പോലെ സ്റ്റേഷന്‍ വഴിയാക്കണമെന്നു യാത്രക്കാര്‍ പറഞ്ഞു.