ദിലീപിന്റെ സുഹൃത്ത് ശരത്ത് അറസ്റ്റില്‍

കൊച്ചി: നടിയെ ആക്രമിച്ച കേസില്‍ ദിലീപിന്റെ സുഹൃത്തും വ്യവസായിയുമായ ശരത് അറസ്റ്റില്‍. തെളിവ് നശിപ്പിച്ചു എന്നതാണ് കുറ്റം. തുടരന്വേഷണത്തിലെ ആദ്യ അറസ്റ്റാണിത്. കേസിലെ 'വിഐപി' ശരത് ആണെന്ന് നേരത്തെ അന്വേഷണ സംഘം കണ്ടെത്തിയിരുന്നു. നടിയെ ആക്രമിച്ച പകര്‍ത്തിയ ദൃശ്യങ്ങള്‍ ദിലീപിന്റെ വീട്ടിലെത്തിച്ചത് ശരത്താണെന്നാണ് ക്രൈംബ്രാഞ്ച് പറയുന്നത്. നടി ആക്രമിക്കപ്പെട്ട കേസ് ഒരു ഇടവേളയ്ക്കു ശേഷം വീണ്ടും വാര്‍ത്താപ്രാധാന്യം നേടിയത് സംവിധായകന്‍ ബാലചന്ദ്രകുമാറിന്റെ കടന്നുവരവോടെയായിരുന്നു. തെളിവുകള്‍ പുറത്തു വിട്ട കൂട്ടത്തില്‍ ബാലചന്ദ്രകുമാര്‍ അവതരിപ്പിച്ച ആദൃശ്യ കഥാപാത്രമായിരുന്നു വിഐപി. ആരാണ് വിഐപി എന്ന കാര്യത്തില്‍ ബാലചന്ദ്രകുമാറിനും ഉറപ്പുണ്ടായിരുന്നില്ല. എന്നാല്‍ പീന്നീട് വിഐപി ശരത് ആണെന്നുള്ള നിഗമനത്തിലാണ് അന്വേഷണ സംഘം എത്തിയത്. സാധാരണ കുടുംബത്തില്‍ ജനിച്ച ശരത് ജി. നായരുടെ വളര്‍ച്ച പെട്ടെന്നായിരുന്നു. ഇരുപത്തിയഞ്ചോളം ടൂറിസ്റ്റ് ബസുകളുടെ ഉടമയാണ്. ഊട്ടിയില്‍ സ്വന്തമായി റിസോര്‍ട്ടുണ്ട്. ആലുവയില്‍ വാടക കെട്ടിടത്തില്‍ ഒരു ഹോട്ടലും ശരത്തിന്റെ ഉടമസ്ഥതയില്‍ പ്രവര്‍ത്തിക്കുന്നുണ്ട്