ശക്തമായ മഴ: 4 ജില്ലകളില്‍ ഓറഞ്ച് അലര്‍ട്ട്; ഇടുക്കി അണക്കെട്ടില്‍ ജലനിരപ്പ് ഉയര്‍ന്നു

തിരുവനന്തപുരം: സംസ്ഥാനത്ത് ഇന്നും ശക്തമായ മഴയ്ക്ക് സാധ്യയതയുണ്ടെന്ന് കാലാവസ്ഥാ വകുപ്പ്. 4 നാല് ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചു. മലപ്പുറം, കോഴിക്കോട്, കണ്ണൂര്‍, കാസര്‍കോട് എന്നീ ജില്ലകളിലാണ് ഓറഞ്ച് അലര്‍ട്ട്. ലക്ഷദ്വീപിന് സമീപവും വടക്കന്‍ തമിഴ്നാട്ടിലും നിലനില്‍ക്കുന്ന ചക്രവാത ചുഴികളാണ് മഴ തുടരാന്‍ കാരണം. പടിഞ്ഞാറന്‍ കാറ്റും ശക്തി പ്രാപിച്ചിട്ടുണ്ട്. സംസ്ഥാനത്താെട്ടാകെ ഇന്ന് വ്യാപകമായി തന്നെ ഒറ്റപ്പെട്ട മഴയ്ക്ക് സാധ്യതയുണ്ടെന്നാണ് കാലാവസ്ഥാ വകുപ്പിന്റെ പ്രവചനം. ഇതേ തുടര്‍ന്ന് 16 മുതല്‍ 19-ാം തീയതി വരെ കേരള തീരത്ത് മത്സ്യബന്ധനത്തിന് നിരോധനമേര്‍പ്പെടുത്തിയിരിക്കുകയാണ്. ഇനി ഒരു അറിയിപ്പ് ഉണ്ടാകുന്നതുവരെ മത്സ്യബന്ധനത്തിന് പോകാന്‍ പാടില്ല. അതേസമയം, കനത്ത മഴയെത്തുടര്‍ന്ന് ഇടുക്കി അണക്കെട്ടില്‍ ജലനിരപ്പ് ഉയര്‍ന്നു. ഇടുക്കിയില്‍ ജലനിരപ്പ് ഇന്നലെ 2340.10 അടിയായി. കഴിഞ്ഞവര്‍ഷം ഇതേദിവസം 2334.94 അടിയായിരുന്നു ജലനിരപ്പ്. കഴിഞ്ഞ വര്‍ഷത്തേതിലും ആറടി വെള്ളം കൂടുതലുണ്ട്. അപ്രതീക്ഷിതമായ കനത്ത മഴ മൂലമാണ് അണക്കെട്ടില്‍ ജലനിരപ്പ് ഉയര്‍ന്നത്.