ഷാബാ ഷെരീഫ് കൊലപാതകം : പ്രതികളുമായി തെളിവെടുപ്പ് തുടരുന്നു

പാരമ്പര്യ വൈദ്യന്‍ ഷാബാ ഷെരീഫ് കൊല്ലപ്പെട്ട കേസില്‍ പ്രതികളുമായി തെളിവെടുപ്പ് തുടരുന്നു. മൃതദേഹാവശിഷ്ടങ്ങള്‍ കണ്ടെടുക്കാന്‍ നാവിക സേനയുടെ സഹായത്തോടെ ഇന്നും തിരച്ചില്‍ തുടരും. മുഖ്യ പ്രതി ഷൈബിന്‍ അഷ്റഫ് ഉള്‍പ്പെടെയുള്ള മൂന്നു പ്രതികളുമായാണ് അന്വേഷണ സംഘം തെളിവെടുപ്പ് നടത്തുന്നത്. ഷാബാ ഷരീഫിനെ കൊലപ്പെടുത്തിയ ശേഷം വെട്ടി നുറുക്കി ചാക്കിലാക്കി കാറില്‍ കൊണ്ടുപോയി എടവണ്ണ പാലത്തില്‍ നിന്ന് ചാലിയാറില്‍ തള്ളി എന്നാണ് പ്രതികള്‍ നല്‍കിയ മൊഴി. ഇതിന്റെ അടിസ്ഥാനത്തിലാണ് തെളിവെടുപ്പ് നടക്കുന്നത്. പാലത്തിന്റെ മൂന്നാം തൂണിന് സമീപമാണ് മൃതദേഹം തള്ളിയതെന്നാണ് മുഖ്യപ്രതി ഷൈബിന്‍ അഷ്റഫിനന്റെ മൊഴി. ഈ സാഹചര്യത്തില്‍ ഷൈബിനെയും ഇയാളുടെ ഡ്രൈവര്‍ നിഷാദിനെയും എടവണ്ണ സീതിഹാജി പാലത്തിലെത്തിച്ച് ഇന്നലെ തെളിവെടുത്തിരുന്നു. വലിയ സുരക്ഷാ സന്നാഹങ്ങളോടെ ബോട്ടുകള്‍ ഉള്‍പ്പടെ പ്രയോജനപ്പെടുത്തിയാണ് മൃതദേഹ അവശിഷ്ടത്തിനായി തെരച്ചില്‍ നടത്തിയത്. എന്നാല്‍ അവശിഷ്ടങ്ങള്‍ ഒന്നും കണ്ടെത്താനാകാത്ത സാഹചര്യത്തില്‍ പൊലീസ് നാവിക സേനയുടെ സഹായം തേടുകയായിരുന്നു. പതിനേഴു മാസങ്ങള്‍ക്ക് മുന്‍പ് നടന്ന കൊലപാതകമായതിനാല്‍ മൃതദേഹാവശിഷ്ടങ്ങള്‍ കണ്ടെടുക്കാന്‍ പ്രയാസമാണ്. അവസാന ശ്രമം എന്ന നിലയിലാണ് നാവിക സേനയുടെ സഹായത്തോടെ തെരച്ചില്‍ നടത്തുന്നത്. കഴിഞ്ഞ ദിവസങ്ങളില്‍ പ്രതികളെ വയനാട്, മൈസൂര്‍ എന്നിവിടങ്ങളില്‍ എത്തിച്ച് തെളിവെടുത്തിരുന്നു.