വേണാടും പരശുറാമും അടക്കം 21 ട്രെയിനുകള്‍ മേയ് 28 വരെ റദ്ദാക്കി; നിയന്ത്രണം ഇങ്ങനെ

ചിങ്ങവനം-ഏറ്റുമാനൂര്‍ റൂട്ടില്‍ ഇരട്ടപ്പാത നിര്‍മാണം നടക്കുമ്പോള്‍ വേണാടും പരശുറാമും പോലെ ജനം കാര്യമായി ആശ്രയിക്കുന്ന ട്രെയിനുകള്‍ റെയില്‍വേ റദ്ദാക്കുന്നത് എന്തുകൊണ്ടാകും?. തെക്കന്‍ ജില്ലകളിലെയും മലബാറിലെയും ട്രെയിന്‍ യാത്രികരുടെ സംശയമിതാണ്. റെയില്‍വേയുടെ മറുപടി ഇതാണ്: എറണാകുളത്ത് കൂടുതല്‍ ട്രെയിനുകള്‍ നിര്‍ത്തിയിടാന്‍ സൗകര്യമില്ലാത്തതും ആലപ്പുഴ വഴി ഒരുലൈന്‍ ട്രാക്ക് മാത്രമുള്ളതുമാണു കോട്ടയത്ത് ഗതാഗത നിയന്ത്രണം വന്നതോടെ കൂടുതല്‍ ട്രെയിനുകള്‍ റദ്ദാക്കാന്‍ കാരണം. കൂടുതല്‍ ട്രെയിനുകള്‍ ആലപ്പുഴ വഴി തിരിച്ചുവിട്ടാല്‍ ഒരു ലൈന്‍ ട്രാക്ക് ആയതിനാല്‍ വലിയ ബ്ലോക്ക് ഉണ്ടാകും. എറണാകുളത്ത് ട്രെയിന്‍ അറ്റകുറ്റപ്പണികള്‍ക്കും മറ്റുമായി 3 പിറ്റ്ലൈനുകള്‍ മാത്രമാണ് ഉള്ളത്. ഇത് എറണാകുളത്തുനിന്നു സര്‍വീസ് ആരംഭിക്കുന്ന ട്രെയിനുകളുടെ അറ്റകുറ്റപ്പണികള്‍ക്കു മാത്രമാണു തികയുക. മറ്റു ട്രെയിനുകള്‍ കൂടി എത്തിയാല്‍ കൂടുതല്‍ സമയം എടുക്കും. ഇതു മറ്റു ട്രെയിനുകള്‍ വൈകാന്‍ കാരണമാകുമെന്നും റെയില്‍വേ പറയുന്നു. വേണാട് എക്‌സ്പ്രസ്, പരശുറാം എക്‌സ്പ്രസ്, ചെന്നൈ-തിരുവനന്തപുരം മെയില്‍, കന്യാകുമാരി- ബെംഗളൂരു ഐലന്‍ഡ്, തിരുവനന്തപുരം-കണ്ണൂര്‍ ജനശതാബ്ദി തുടങ്ങിയ ട്രെയിനുകളാണു റദ്ദാക്കുന്നതില്‍ ഏറ്റവും കൂടുതല്‍ യാത്രക്കാര്‍ ആശ്രയിക്കുന്ന ട്രെയിനുകള്‍. 21 ട്രെയിനുകളാണ് ഇന്നു മുതല്‍ 28 വരെയുള്ള ദിവസങ്ങളില്‍ റദ്ദാക്കുന്നത്. 24 മുതല്‍ 28 വരെ പകല്‍ 10 മണിക്കൂര്‍ കോട്ടയം വഴി ഗതാഗത നിയന്ത്രണമുണ്ട്. രാവിലെ 7.45 മുതല്‍ വൈകിട്ട് 5.45 വരെയാണ് നിയന്ത്രണം.