ലഡാക്കില്‍ മരിച്ച സൈനികന്‍ മുഹമ്മദ് ഷൈജലിന്റെ വിയോഗം ഉള്‍ക്കൊള്ളാനാകാതെ കുടുംബവും നാട്ടുകാരും

ലഡാക്കില്‍ വാഹന അപകടത്തില്‍ മരിച്ച സൈനികന്‍ മുഹമ്മദ് ഷൈജലിന്റെ വിയോഗം ഉള്‍ക്കൊള്ളാനാകാതെ കുടുംബവും, നാട്ടുകാരും. കഴിഞ്ഞ ഇരുപത് വര്‍ഷമായി സര്‍വ്വീസിലുള്ള ഷൈജല്‍ രണ്ട് വര്‍ഷം കഴിഞ്ഞാല്‍ സര്‍വ്വീസില്‍ നിന്ന് വിരമിക്കാനിരിക്കെയാണ് അപകടം സംഭവിച്ചത്. ഈ കഴിഞ്ഞ നോമ്പിന് മുമ്പാണ് ഷൈജല്‍ നാട്ടില്‍ വന്ന് തിരിച്ച് പോയത്. മരണസംബന്ധിച്ച് ഔദ്യോഗിക അറിയിപ്പ് ഇതുവരെ കുടുംബത്തിന് ലഭ്യമായിട്ടില്ല. സുഹൃത്തുക്കള്‍ വഴിയും, മാധ്യമങ്ങള്‍ വഴിയും ലഭിച്ചിട്ടുള്ള അറിവ് മാത്രമാണ് കുടുംബത്തിനുള്ളത്. മൃതദേഹം വേഗത്തില്‍ നാട്ടിലെത്തിക്കാന്‍ വേണ്ട നടപടികള്‍ ഇ.ടി. മുഹമ്മദ് ബഷീര്‍ എംപി ഇടപെട്ട് നടത്തുന്നുണ്ട്. ഇന്നലെ രാവിലെ ഒമ്പതിനായിരുന്നു അപകടം. ഇന്ത്യ ചൈന അതിര്‍ത്തിയിലെ തുര്‍തുക് സെക്ടറിലേക്കു പോകും വഴി ഇവര്‍ സഞ്ചരിച്ച വാഹനം നിയന്ത്രണം വിട്ട് ഷ്യോക് നദിയിലേക്കു വീഴുകയായിരുന്നു. 26 സൈനികരാണു വാഹനത്തിലുണ്ടായിരുന്നത്. റോഡില്‍നിന്നു തെന്നിമാറിയ വാഹനം ഏകദേശം 50-60 അടി താഴ്ചയിലേക്ക് വീണാണ് അപകടം.