ആഗോളതലത്തില്‍ ഈന്തപ്പഴ കയറ്റുമതിയില്‍ സൗദി ഒന്നാം സ്ഥാനത്ത്

ലോകത്ത് ഈന്തപ്പഴ കയറ്റുമതിയില്‍ സൗദി ഒന്നാമതെത്തി. 1.2 ബില്യണ്‍ റിയാലിന്റെ ഈന്തപ്പഴം കഴിഞ്ഞ വര്‍ഷം കയറ്റുമതി ചെയ്തു. ലോകത്തെ ആകെ ഈന്തപ്പനകളുടെ 27 ശതമാനവും സൗദിയിലാണ്. നേട്ടത്തില്‍ യുഎന്‍ ഫുഡ് ആന്‍ഡ് അഗ്രികള്‍ച്ചര്‍ ഓര്‍ഗനൈസേഷന്‍ സൗദി അറേബ്യയെ അഭിനന്ദിച്ചു. ഇന്റര്‍നാഷണല്‍ ട്രേഡ് സെന്ററിന്റെ ട്രേഡ് മാപ്പ് അനുസരിച്ച്, 2021ലെ ഈത്തപ്പഴ കയറ്റുമതിയുടെ മൂല്യത്തില്‍ സൗദി അറേബ്യ ആഗോളതലത്തില്‍ ഒന്നാം സ്ഥാനത്താണ്. 2021-ല്‍ സൗദി ഈത്തപ്പഴ കയറ്റുമതിയുടെ മൂല്യം 1.2 ബില്യണ്‍ റിയാലാണ്.113 രാജ്യങ്ങളിലേക്കുള്ള കയറ്റുമതിയിലൂടെ കഴിഞ്ഞ അഞ്ച് വര്‍ഷത്തിനിടയില്‍ കയറ്റുമതിയുടെ ഏറ്റവും ഉയര്‍ന്ന വാര്‍ഷിക വളര്‍ച്ചാ നിരക്കായ 12 ശതമാനം രാജ്യം സാക്ഷാത്കരിച്ചിട്ടുണ്ട്. രാജ്യത്തെ ഈന്തപ്പനകളുടെയും ഈന്തപ്പഴങ്ങളുടെയും മൂല്യം ഏകദേശം 7.5 ബില്യണ്‍ റിയാലിലെത്തി. ഇത് മൊത്ത കാര്‍ഷിക ഉല്‍പാദനത്തിന്റെ 12 ശതമാനവും, എണ്ണ ഇതര മൊത്ത ഉല്‍പാദനത്തിന്റെ 0.4 ശതമാനവുമാണ്. സൗദിയിലെ മൊത്തം ഈന്തപ്പനകളുടെ എണ്ണം 33 ദശലക്ഷത്തിലെത്തി. ഇത് ലോകത്തിലെ മൊത്തം ഈന്തപ്പനകളുടെ 27 ശതമാനത്തെ വരും. സൗദി വിഷന്‍ 2030ന്റെ ഭാഗമായി ഈന്തപ്പഴ വിപണി സജീവമാക്കാനും കയറ്റുമതി വര്‍ധിപ്പിക്കാനും നിരവധി പദ്ധതികളാണ് ആവിഷ്‌കരിച്ചിരിക്കുന്നത്.