വിഡിയോ എടുക്കുന്നതിനിടെ ഒഴുക്കില്‍പ്പെട്ട് അപകടം; പെണ്‍കുട്ടിയുടെ മൃതദേഹം കണ്ടെത്തി

വിഡിയോ എടുക്കുന്നതിനിടെ ശനിയാഴ്ച കല്ലടയാറ്റില്‍ ഒഴുക്കില്‍പ്പെട്ട് കാണാതായ പെണ്‍കുട്ടിയുടെ മൃതദേഹം കണ്ടെത്തി. പത്തനംതിട്ട കൂടല്‍ എസ്എന്‍യുപി സ്‌കൂളിനു സമീപം മനോജ് ഭവനില്‍ മനോജിന്റെ മകള്‍ അപര്‍ണയുടെ (ഗൗരി-16) മൃതദേഹമാണ് കണ്ടെടുത്തത്. സഹോദരങ്ങള്‍ ഉള്‍പ്പെടെ മൂന്നു വിദ്യാര്‍ഥികളാണ് ഒഴുക്കില്‍പ്പെട്ടത്. ഇതില്‍ രണ്ടുപേരെ രക്ഷപ്പെടുത്തിയിരുന്നു. ഇവര്‍ ഒഴുക്കില്‍പ്പെട്ട കുറ്റിമൂട്ടില്‍ കടവില്‍നിന്ന് രണ്ടര കിലോമീറ്റര്‍ മാറിയാണ് അപര്‍ണയുടെ മൃതദേഹം കണ്ടെത്തിയത്. അപര്‍ണയ്ക്കൊപ്പം ഒഴുക്കില്‍പ്പെട്ട കുണ്ടയം വെള്ളാറമണ്‍ കുറ്റിമൂട്ടില്‍കടവ് അഞ്ജന വിലാസത്തില്‍ അജിയുടെ മക്കളായ അനുഗ്രഹ(19), സഹോദരന്‍ അഭിനവ്(12) എന്നിവരാണ് രക്ഷപ്പെട്ടത്. ഇതില്‍ അനുഗ്രഹയെ നാട്ടുകാര്‍ രക്ഷപ്പെടുത്തി തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിക്കുകയായിരുന്നു. അഭിനവ് ആറ്റിലൂടെ ഒഴുകിയെത്തിയ മരച്ചില്ലകളില്‍ പിടിച്ചു കരയ്ക്കു കയറി. ഇന്നലെ രാവിലെ 11നാണു സംഭവം.സുഹൃത്തായി അനുഗ്രഹയുടെ വീട്ടില്‍ ഇന്നലെ രാവിലെയാണ് അപര്‍ണ എത്തിയത്. പത്തനാപുരം മൗണ്ട് താബോര്‍ ഗേള്‍സ് ഹൈസ്‌കൂളിലെ പത്താംക്ലാസ് വിദ്യാര്‍ഥികളാണ് ഇരുവരും. ഇവിടെനിന്ന് അമ്പലത്തില്‍ പോകുകയാണെന്നു പറഞ്ഞിറങ്ങിയ ഇവര്‍ കല്ലടയാറ്റില്‍ കുറ്റിമൂട്ടില്‍ കടവിലെത്തി വിഡിയോ എടുക്കുന്നതിനിടെ ഒഴുക്കില്‍പെടുകയായിരുന്നു. പെണ്‍കുട്ടികള്‍ ആറ്റില്‍ ഇറങ്ങിനില്‍ക്കുകയും അഭിനവ് കരയിലിരുന്നു വിഡിയോ എടുക്കുകയുമായിരുന്നു. ആദ്യം പെണ്‍കുട്ടികളാണ് ഒഴുക്കില്‍പ്പെട്ടത്. ഇവരെ രക്ഷിക്കാനിറങ്ങിയ അഭിനവും ആറ്റില്‍ വീണു. അനുഗ്രഹയെ പന്ത്രണ്ട് മുറി ഭാഗത്തു നിന്നും അഭിനവിനെ മാലൂരില്‍ നിന്നുമാണു രക്ഷപ്പെടുത്തിയത്. അഗ്‌നിശമന സേനയും കൊല്ലത്തുനിന്ന് എത്തിയ സ്‌കൂബ ടീമും അപര്‍ണയ്ക്കായി ഇന്നലെ തിരച്ചില്‍ നടത്തിയെങ്കിലും കണ്ടെത്താനായിരുന്നില്ല. കഴിഞ്ഞ ദിവസങ്ങളിലെ മഴയും ഇവര്‍ അകപ്പെട്ട ഭാഗത്തെ ചെളിയും മൂലം രക്ഷാപ്രവര്‍ത്തനം ദുഷ്‌കരമായിരുന്നു. രാത്രി നിര്‍ത്തിവച്ച തിരച്ചില്‍ രാവിലെ പുനരാരംഭിച്ചതിനു പിന്നാലെയാണ് അപര്‍ണയുടെ മൃതദേഹം കണ്ടെത്തിയത്.