രണ്ടു പതിറ്റാണ്ടിന്റെ കാത്തിരിപ്പ് സഫലം; പുതിയ പാതയില്‍ ചൂളംവിളിച്ച് പാലരുവി

കോട്ടയം രണ്ടു പതിറ്റാണ്ടിന്റെ കാത്തിരിപ്പിനു വിരാമമിട്ടു കോട്ടയം വഴിയുള്ള റെയില്‍വേ ഇരട്ടപ്പാത യാഥാര്‍ഥ്യമായി. ഏറ്റുമാനൂര്‍-ചിങ്ങവനം പാത കമ്മിഷന്‍ ചെയ്തു. പാലരുവി എക്‌സ്പ്രസാണു പാതയിലൂടെ ആദ്യം കടന്നുപോയത്. സമ്പൂര്‍ണ ഇരട്ടപ്പാതയുള്ള സംസ്ഥാനം എന്ന പദവി ഇതോടെ കേരളത്തിനും സ്വന്തമായി. ഏറ്റുമാനൂരില്‍നിന്നു പുതിയ ട്രാക്കിലൂടെ എത്തിയ പാലക്കാട് ജംക്ഷന്‍ - തിരുനല്‍വേലി പാലരുവി എക്‌സ്പ്രസ് 9.42ന് കോട്ടയം സ്റ്റേഷനില്‍ ഫ്‌ലാഗ് ഓഫ് ചെയ്തതോടെ പാതയ്ക്ക് ഔദ്യോഗിക ഉദ്ഘാടനമായി. തോമസ് ചാഴികാടന്‍ എംപി, ഡിആര്‍എം മുകുന്ദ് രാമസ്വാമി, ദക്ഷിണ റെയില്‍വേ കണ്‍സ്ട്രക്ഷന്‍ വിഭാഗം ചീഫ് അഡ്മിനിസ്‌ട്രേറ്റീവ് ഓഫിസര്‍ രാജേന്ദ്ര പ്രസാദ് ജിംഗാര്‍, ചീഫ് എന്‍ജിനീയര്‍ വി.രാജഗോപാല്‍ എന്നിവരുടെ സാന്നിധ്യത്തില്‍ കോട്ടയം സ്റ്റേഷന്‍ മാനേജര്‍ ബാബു തോമസാണു ഫ്‌ലാഗ് ഓഫ് ചെയ്തത്. വൈകിട്ട് ആറോടെ നിര്‍മാണ പ്രവര്‍ത്തനങ്ങള്‍ പൂര്‍ത്തിയാക്കിയ ശേഷം ദക്ഷിണ റെയില്‍വേ കണ്‍സ്ട്രക്ഷന്‍ വിഭാഗം ചീഫ് അഡ്മിനിസ്‌ട്രേറ്റീവ് ഓഫിസറുടെ നേതൃത്വത്തില്‍ പാതയില്‍ ഇന്‍സ്‌പെക്ഷന്‍ വെഹിക്കിള്‍ ഉപയോഗിച്ച് അവസാനവട്ട പരീക്ഷണ ഓട്ടം നടത്തിയിരുന്നു. തുടര്‍ന്ന് പാത സര്‍വീസിനായി കൊമേഴ്ഷ്യല്‍ വിഭാഗത്തിന് കൈമാറി. കോട്ടയം വഴി ഇരട്ടപ്പാത തുറക്കുന്നതോടെ കേരളത്തിനു പുതിയ ട്രെയിനുകള്‍ക്കുള്ള വഴി കൂടിയാണു തുറക്കുന്നത്. ചിങ്ങവനം-ഏറ്റുമാനൂര്‍ (16.7 കിമീ) ഒറ്റവരിപ്പാത എന്ന കുപ്പിക്കഴുത്തായിരുന്നു ട്രെയിനുകളുടെ സുഗമമായ ഓട്ടത്തിനും പുതിയ ട്രെയിനുകള്‍ ലഭിക്കുന്നതിനും പ്രധാന തടസ്സമായി റെയില്‍വേ ചൂണ്ടിക്കാട്ടിയിരുന്നത്. കോട്ടയം പാതയിലൂടെ കൂടുതല്‍ ട്രെയിനുകള്‍ എന്ന ദീര്‍ഘകാല ആവശ്യത്തിന് ഇനിയെങ്കിലും പരിഹാരമുണ്ടാകുമെന്ന പ്രതീക്ഷയിലാണു യാത്രക്കാര്‍. കൂടുതല്‍ പ്ലാറ്റ്‌ഫോമുകള്‍ വന്നതോടെ ചെന്നൈ, ബെംഗളൂരു, ഹൈദരാബാദ് എന്നിവിടങ്ങളില്‍നിന്നു കോട്ടയത്തേക്കു ട്രെയിനുകളോടിക്കാന്‍ കഴിയും.