ഭാഗ്യവാന്മാരെ കണ്ടെത്തി; വിഷു ബംപര്‍ പത്തുകോടി കന്യാകുമാരിയിലെ ഡോക്ടര്‍ക്കും ബന്ധുവിനും

തിരുവനന്തപുരം: സംസ്ഥാന വിഷു ബംപര്‍ ലോട്ടറി ഒന്നാം സമ്മാനം കന്യാകുമാരി സ്വദേശികള്‍ക്ക്. ഡോക്ടര്‍ പ്രദീപ്, ബന്ധു രമേശന്‍ എന്നിവര്‍ക്കാണ് ഒന്നാം സമ്മാനമായ പത്തുകോടി ലഭിക്കുക. പ്രദീപ് കുമാറിന്റെ ബന്ധുവിനെ യാത്രയയക്കാന്‍ തിരുവനന്തപുരം വിമാനത്താവളത്തിലെത്തിയപ്പോഴാണ് ഇവര്‍ ടിക്കറ്റ് എടുത്തത്. തമിഴ്നാട് സര്‍ക്കാര്‍ ഉദ്യോഗസ്ഥനാണ് ഡോ. പ്രദീപ്കുമാര്‍. വരാന്‍ സമയം കിട്ടാത്തതുകൊണ്ട് എത്തിച്ചേരാന്‍ വൈകിയതെന്ന് ഡോ. പ്രദീപ് മാതൃഭൂമി ന്യൂസിനോടു പ്രതികരിച്ചു. കന്യാകുമാരി ജില്ലയിലെ മണവാളക്കുറിച്ചി സ്വദേശികളാണ് ഇവര്‍. നറുക്കെടുപ്പ് നടന്ന് രണ്ടുമൂന്നു ദിവസം കഴിഞ്ഞാണ് അറിഞ്ഞത്. വീട്ടില്‍ വരുത്തുന്നത് മാതൃഭൂമി ദിനപ്പത്രമാണ്. അതില്‍ നോക്കിയാണ് ഒന്നാം സമ്മാനം അടിച്ച വിവരം അറിഞ്ഞത്. എന്താണ് ഭാവിപദ്ധതിയെന്ന ചോദ്യത്തിന് കുറച്ച് ബാധ്യതകളുണ്ട് അത് തീര്‍ക്കണം എന്നായിരുന്നു മറുപടി. ദൈവത്തിന് നന്ദി പറയുന്നെന്നും അദ്ദേഹം കൂട്ടിച്ചേര്‍ത്തു.സ്ഥിരമായി ലോട്ടറി എടുക്കുന്ന പതിവുള്ളവരാണ് ഇരുവരും. ചെറിയതുകകള്‍ മുന്‍പ് സമ്മാനമായി ലഭിച്ചിട്ടുണ്ട്. എന്നാല്‍ ഇതുപോലെ വലിയതുക ലഭിക്കുന്നത് ആദ്യമായാണെന്നും പ്രദീപ് കൂട്ടിച്ചേര്‍ത്തു. തിരുവനന്തപുരത്ത് വിറ്റ ടിക്കറ്റിനായിരുന്നു ഇത്തവണ ഒന്നാം സമ്മാനം അടിച്ചത്. വലിയതുറയിലെ രങ്കന്‍-ജസീന്ത ദമ്പതിമാരില്‍നിന്നാണ് ഇവര്‍ ടിക്കറ്റ് വാങ്ങിയത്. മേയ് 22-നായിരുന്നു വിഷു ബംപറിന്റെ നറുക്കെടുപ്പ് നടന്നത്. ആറു കോടി 16 ലക്ഷം രൂപയാണ് നികുതി കിഴിച്ച് ഇവര്‍ക്കു ലഭിക്കുക. തിങ്കളാഴ്ച രാവിലെ തിരുവനന്തപുരത്തെ ലോട്ടറി വകുപ്പിന്റെ ഓഫീസിലെത്തിയാണ് പ്രദീപ് കുമാറും രമേശനും ടിക്കറ്റ്, ഡയറക്ടര്‍ക്ക് കൈമാറിയത്.