സ്വിഫ്റ്റ് ബസ് കുടുങ്ങിയത് ടെര്‍മിനലിലെ സൗകര്യക്കുറവ് കാരണം; ഡി.ടി.ഒ. റിപ്പോര്‍ട്ട് സമര്‍പ്പിച്ചു

കോഴിക്കോട് : മാവൂര്‍ റോഡിലെ കെ.എസ്.ആര്‍.ടി.സി. ടെര്‍മിനലിലെ തൂണുകള്‍ക്കിടയില്‍ കെ-സ്വിഫ്റ്റ് ബസ് കുടുങ്ങിയത് ടെര്‍മിനലിലെ സൗകര്യക്കുറവ് കാരണമെന്ന് ജില്ലാ ട്രാന്‍സ്‌പോര്‍ട്ട് ഓഫീസറുടെ റിപ്പോര്‍ട്ട്. കെ.എസ്.ആര്‍.ടി.സി. ടെര്‍മിനലില്‍ നിലവില്‍ ബസുകള്‍ തിരിക്കാന്‍ കഴിയാത്ത അവസ്ഥയാണ്. കെ-സ്വിഫ്റ്റ്പോലുള്ള വലിയ ബസുകള്‍ എളുപ്പത്തില്‍ ട്രാക്കിലേക്ക് കയറ്റാന്‍ കഴിയില്ല. ബസുകള്‍ തൂണുകളിലുരയുന്നത് പതിവാകുന്നു. ബസുകള്‍തട്ടി എല്ലാ തൂണുകളുടെയും പ്ലാസ്റ്ററിങ് ഇളകിപ്പോയിട്ടുണ്ട്. കെ-സ്വിഫ്റ്റ് ബസായതുകൊണ്ട് മാത്രമാണ് ഇത് ചര്‍ച്ചയായതെന്നും ഡ്രൈവറുടെ മാത്രം വീഴ്ചയായി കാണാന്‍ കഴിയില്ലെന്നും കെ.എസ്.ആര്‍.ടി.സി. മാനേജിങ് ഡയറക്ടര്‍ ബിജുപ്രഭാകറിന് നല്‍കിയ റിപ്പോര്‍ട്ടില്‍ പറയുന്നു. വെള്ളിയാഴ്ചയാണ് ബെംഗളൂരുവില്‍ നിന്നെത്തിയ കെ-സ്വിഫ്റ്റ് ബസ് ടെര്‍മിനലിലെ തൂണുകള്‍ക്കിടയില്‍ കുടുങ്ങിയത്. 15 മണിക്കൂര്‍ കഴിഞ്ഞാണ് തൂണുകളുടെ ഇരുമ്പുവളയം മുറിച്ചുമാറ്റി ബസ് പുറത്തെടുത്തത്. തൊട്ടടുത്ത ദിവസവും തൂണില്‍ത്തട്ടി ബസിന്റെ ചില്ല് പൊട്ടിയിരുന്നു.