‘സത്യം കോടതിയില്‍ തെളിയിക്കും’; വിജയ് ബാബു 39 ദിവസത്തിനു ശേഷം തിരിച്ചെത്തി

പുതുമുഖ നടിയെ പീഡിപ്പിച്ച കേസില്‍ കുറ്റാരോപിതനായ നടനും നിര്‍മാതാവുമായ വിജയ് ബാബു നാട്ടിലെത്തി. നടിയുടെ പരാതിക്കു പിന്നാലെ വിജയ് ബാബു വിദേശത്തേക്കു കടന്നിരുന്നു. 39 ദിവസത്തിനു ശേഷം, രാവിലെ ഒന്‍പതരയോടെ കൊച്ചി വിമാനത്താവളത്തിലാണ് നടന്‍ മടങ്ങിയെത്തിയത്. വിജയ് ബാബുവിനെ വ്യാഴാഴ്ച വരെ അറസ്റ്റ് ചെയ്യരുതെന്നു ഹൈക്കോടതി നിര്‍ദേശിച്ചിരുന്നു. 'കോടതിയില്‍ വിശ്വാസമുണ്ട്. ഒപ്പം നിന്നവര്‍ക്കെല്ലാം നന്ദി. പൊലീസ് അന്വേഷണത്തോടു പൂര്‍ണമായി സഹകരിക്കും. സത്യം കോടതിയില്‍ തെളിയിക്കും'- വിമാനത്താവളത്തില്‍ മാധ്യമങ്ങളോടു വിജയ് ബാബു പ്രതികരിച്ചു. വ്യാഴാഴ്ച വരെ അറസ്റ്റ് ചെയ്യരുതെന്നു ഹൈക്കോടതി നിര്‍ദേശിച്ചതോടെ ബുധനാഴ്ചതന്നെ നാട്ടിലേക്കു വരാന്‍ നടന്‍ തീരുമാനിച്ചത്. ഒന്നിലേറെ തവണ വിജയ് ബാബു യാത്ര റദ്ദാക്കിയത് അറസ്റ്റിനെയും അന്വേഷണത്തെയും ബാധിച്ചപ്പോഴാണു ഹൈക്കോടതി ഇടപെട്ടത്. വിജയ്ബാബുവിന്റെ ബിസിനസ് പങ്കാളിയെ അന്വേഷണ സംഘം ചോദ്യം ചെയ്തിരുന്നു. വിജയ് ബാബുവിന് മുന്‍കൂര്‍ ജാമ്യം അനുവദിക്കരുതെന്ന് അതിജീവിത കോടതിയില്‍ ആവശ്യപ്പെട്ടിരുന്നു. പ്രതി നിയമത്തിന്റെ മുന്നില്‍നിന്ന് ഒളിച്ചോടിയയാളാണെന്നും അറസ്റ്റ് അനിവാര്യമായതിനാല്‍ മുന്‍കൂര്‍ ജാമ്യം അനുവദിക്കരുതെന്നും പൊലീസും കോടതിയില്‍ വ്യക്തമാക്കി. എന്നാല്‍, പരാതിക്കാരിയെ ലൈംഗികമായി ഉപദ്രവിച്ചിട്ടില്ലെന്നും പണവും സിനിമയില്‍ അവസരവും നല്‍കാത്തതിലുള്ള പ്രതികാരത്തിലുമാണ് പരാതി നല്‍കിയതെന്നാണ് വിജയ് ബാബുവിന്റെ വാദം. ഇതു തെളിയിക്കുന്ന വാട്‌സാപ് ചാറ്റുകളും കോടതിയില്‍ സമര്‍പ്പിച്ചിരുന്നു. പാസ്‌പോര്‍ട്ട് റദ്ദാക്കുകയും സ്വത്തുക്കള്‍ കണ്ടു കെട്ടുന്നതിലേക്കുള്ള നടപടികളിലേക്ക് പൊലീസ് നീങ്ങുകയും ചെയ്തതോടെയാണ് വിജയ് ബാബു ജോര്‍ജിയയില്‍നിന്നു ദുബായിലെത്തിയത്.