സ്‌കൂള്‍ വനിതാ കൗണ്‍സലറുടെ ആത്മഹത്യ: വിവാഹ വാഗ്ദാനം നല്‍കി വഞ്ചിച്ച പോലീസുകാരനെ പിരിച്ചുവിട്ടു

മൂന്നാര്‍: സ്‌കൂള്‍ വനിതാ കൗണ്‍സലര്‍ ഷീബാ ഏയ്ഞ്ചല്‍ റാണി ആത്മഹത്യചെയ്ത സംഭവത്തില്‍ സസ്പെന്‍ഷനിലായിരുന്ന പോലീസ് ഉദ്യോഗസ്ഥനെ സര്‍വീസില്‍നിന്ന് പിരിച്ചുവിട്ടു. ശാന്തന്‍പാറ സ്റ്റേഷനിലെ സി.പി.ഒ. ആയിരുന്ന കൊന്നത്തടി സ്വദേശി ശ്യാംകുമാര്‍(32)നെയാണ് പിരിച്ചുവിട്ടത്. ഇയാള്‍ വിവാഹ വാഗ്ദാനം നല്‍കി കബളിപ്പിച്ചതിന്റെ മനോവിഷമത്തിലാണ് കൗണ്‍സലര്‍ ആത്മഹത്യചെയ്തതെന്ന് അന്വേഷണത്തില്‍ കണ്ടെത്തിയിരുന്നു. ജില്ലാ പോലീസ് മേധാവി ആര്‍. കറുപ്പസ്വാമിയാണ് ഇയാളെ പിരിച്ചുവിട്ടുകൊണ്ട് ഉത്തരവിട്ടത്. നല്ലതണ്ണി റോഡില്‍ താമസിച്ചിരുന്ന ഷീബാ ഏയ്ഞ്ചല്‍ റാണി(സ്വപ്ന-27)യെ ജനുവരി ഒന്നിനാണ് വീടിനുള്ളില്‍ തൂങ്ങിമരിച്ച നിലയില്‍ കണ്ടെത്തിയത്. മൂന്നാര്‍ സ്റ്റേഷനില്‍ മുന്‍പ് ജോലി ചെയ്തിരുന്ന ശ്യാംകുമാര്‍ യുവതിയുമായി വര്‍ഷങ്ങളായി പ്രണയത്തിലായിരുന്നു. വിവാഹിതനും ഒരു കുട്ടിയുടെ അച്ഛനുമാണ് ഇയാള്‍. ഭാര്യയുമായി പിരിഞ്ഞുതാമസിക്കുകയാണെന്നും വിവാഹമോചനം ലഭിച്ചാലുടന്‍ വിവാഹം ചെയ്യാമെന്നും യുവതിക്ക് വാഗ്ദാനം നല്‍കിയിരുന്നു. ഇരുവരും ഏറെനാള്‍ ഒരുമിച്ച് താമസിച്ചു. എന്നാല്‍, ശ്യാംകുമാര്‍ ഇക്കാലയളവിലും ഭാര്യയ്ക്കൊപ്പവും ജീവിക്കുകയായിരുന്നുവെന്ന് യുവതിക്ക് മനസ്സിലായി. വഞ്ചിക്കപ്പെട്ടതിന്റെ മനോവിഷമത്തില്‍ യുവതി ജീവനൊടുക്കുകയായിരുന്നു എന്നാണ് കണ്ടെത്തിയിരിക്കുന്നത്. യുവതിയുടെ അച്ഛന്റെ പരാതിയില്‍ നര്‍ക്കോട്ടിക് ഡിവൈ.എസ്.പി. എ.ജി. ലാലാണ് ആദ്യം അന്വേഷണം നടത്തിയത്. അദ്ദേഹത്തിന്റെ റിപ്പോര്‍ട്ടിന്റെ അടിസ്ഥാനത്തില്‍ ജനുവരി എട്ടിന് ശ്യാംകുമാറിനെ സസ്പെന്‍ഡ് ചെയ്തിരുന്നു. തുടര്‍ന്ന് ജില്ലാ ഡി.സി.ആര്‍.ബി. ഡിവൈ.എസ്.പി. തോമസ് സമര്‍പ്പിച്ച അന്വേഷണ റിപ്പോര്‍ട്ടിലും ഇയാള്‍ കുറ്റക്കാരനാണെന്ന് കണ്ടെത്തിയിരുന്നു. ഭാര്യയും കുട്ടിയുമുള്ള ഇയാള്‍ ഇക്കാര്യം മറച്ചുവെച്ച് വിവാഹ വാഗ്ദാനം നല്‍കിയതും വഞ്ചിക്കപ്പെട്ട് യുവതി ആത്മഹത്യ ചെയ്തതും പോലീസ് സേനയ്ക്ക് കളങ്കമായെന്നാണ് റിപ്പോര്‍ട്ട്. പോലീസുകാരനെതിരേ യുവതിയുടെ അച്ഛന്‍ 2017-ല്‍ തന്നെ പോലീസില്‍ പരാതി നല്‍കിയിരുന്നു. തുടര്‍ന്ന് അന്ന് ഇയാളെ മൂന്നാര്‍ സ്റ്റേഷനില്‍നിന്ന് സ്ഥലംമാറ്റിയിരുന്നു.