ചോദ്യം ചെയ്യലിന് നടന്‍ വിജയ് ബാബു വീണ്ടും ഹാജരായി; ജാമ്യഹര്‍ജി ഇന്ന്

പുതുമുഖ നടിയെ പീഡിപ്പിച്ച കേസില്‍ രണ്ടാം ദിവസത്തെ ചോദ്യം ചെയ്യലിനായി നടനും നിര്‍മാതാവുമായ വിജയ് ബാബു ഹാജരായി. അസി.പൊലീസ് കമ്മിഷണര്‍ വൈ.നിസാമുദീന്റെ നേതൃത്വത്തിലുള്ള പ്രത്യേക സംഘമാണു വിജയ്ബാബുവിനെ ചോദ്യംചെയ്യുന്നത്. വിജയ് ബാബുവിന്റെ മുന്‍കൂര്‍ ജാമ്യഹര്‍ജി ഹൈക്കോടതി ഇന്നു പരിഗണിക്കും. കോടതിയുടെ നിര്‍ദേശത്തിന്റെ അടിസ്ഥാനത്തിലായിരിക്കും അന്വേഷണത്തിലെ തുടര്‍നടപടികള്‍. വിദേശത്ത് ഒളിവിലായിരുന്ന വിജയ്ബാബു ഇന്നലെയാണ് കൊച്ചിയിലെത്തിയത്. ഇന്നുവരെ അറസ്റ്റ് ചെയ്യരുതെന്ന ഹൈക്കോടതി വിധിയുടെ പശ്ചാത്തലത്തില്‍ ഇന്നലെ രാവിലെ കൊച്ചി രാജ്യാന്തര വിമാനത്താവളത്തില്‍ ഇറങ്ങിയ വിജയ് ബാബു 11.30 മണിയോടെ അന്വേഷണ ഉദ്യോഗസ്ഥന്‍ മുന്‍പാകെ ഹാജരായിരുന്നു. തുടര്‍ന്ന് ഉച്ചയ്ക്കു 12 മണിക്ക് ആരംഭിച്ച ചോദ്യം ചെയ്യല്‍ രാത്രി 8.30 വരെ നീണ്ടു.