കോഴിക്കോട് രൂപത നൂറിന്റെ നിറവില്‍; ശതാബ്ദി ആഘോഷം 12ന്; മുഖ്യമന്ത്രി ഉദ്ഘാടനം ചെയ്യും

കോഴിക്കോട് രൂപത നൂറിന്റെ നിറവില്‍. ശതാബ്ദി ആഘോഷങ്ങള്‍ക്ക് 12ന് തുടക്കമാവും. മലബാറിന്റെ വികസന ചരിത്രത്തില്‍ പ്രധാന പങ്കുവഹിച്ച കോഴിക്കോട് രൂപത 1923 ജൂണ്‍ 12നാണ് നിലവില്‍ വന്നത്. മംഗലാപുരം രൂപതാ മെത്രാനായിരുന്ന ഫാ.പെരീനിയാണ് കോഴിക്കോട് ആസ്ഥാനമായി രൂപത സ്ഥാപിക്കണമെന്ന് റോമിലേക്ക് അഭ്യര്‍ഥന നടത്തിയത്. വിദ്യാഭ്യാസരംഗത്തും ആതുരസേവന രംഗത്തും ഒട്ടേറെ സ്ഥാപനങ്ങള്‍ക്കു തുടക്കമിട്ടു. അന്ധവിദ്യാലയവും കുഷ്ഠരോഗം ബാധിച്ചവരുടെ പുനരധിവാസകേന്ദ്രവുമടക്കം അനേകം സ്ഥാപനങ്ങളാണ് രൂപത മലബാറില്‍ കൊണ്ടുവന്നത്. രൂപതയുടെ ശതാബ്ദി ആഘോഷം 12ന് വൈകിട്ട് 3.30ന് സെന്റ്‌ജോസഫ്‌സ് ദേവാലയത്തില്‍ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. വരാപ്പുഴ അതിരൂപത മെത്രാപ്പോലീത്ത ജോസഫ് കളത്തിപ്പറമ്പിലിന്റെ മുഖ്യകാര്‍മികത്വത്തില്‍ ദിവ്യബലി അര്‍പ്പിക്കും. സീറോ മലബാര്‍സഭ മേജര്‍ ആര്‍ച്ച് ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരി സന്ദേശം നല്‍കും. മംഗലാപുരം, െൈമെസൂര്‍, പോണ്ടിച്ചേരി, കോയമ്പത്തൂര്‍, രൂപതകളില്‍നിന്ന് ഇന്നത്തെ കോഴിക്കോട്, മലപ്പുറം, വയനാട്, കണ്ണൂര്‍ ജില്ലകളുള്‍പ്പെടുന്ന മലബാര്‍പ്രദേശം വേര്‍തിരിച്ചെടുത്താണ് പിയൂസ് പതിനൊന്നാമന്‍ മാര്‍പാപ്പ കോഴിക്കോട് രൂപതയ്ക്ക് രൂപം നല്‍കിയത്. ബിഷപ്പ് പോള്‍ പെരീനിയായിരുന്നു ആദ്യ മെത്രാന്‍. അദ്ദേഹത്തിന്റെ കാലശേഷം അപ്പോസ്തലിക് അഡ്മിനിസ്‌ട്രേറ്ററായിരുന്ന മോണ്‍. ബെഞ്ചമിന്‍.എം.റസാനിയാണ് 1932 മുതല്‍ 38 വരെ രൂപതയുടെ ഭരണം നിര്‍വഹിച്ചത്. 1938 മാര്‍ച്ച് 13ന് രൂപതയുടെ രണ്ടാമത്തെ മെത്രാനായി റവ.ഡോ. ലിയോ പ്രെസര്‍പ്പിയോ അഭിഷിക്തനായി. 1948 മുതല്‍ 1980 വരെ രൂപതയ്ക്ക് നേതൃത്വം നല്‍കിയത് ബിഷപ്പ് ആല്‍ദോ മരിയ പത്രോണിയാണ്. 1980 സെപ്റ്റംബര്‍ ഏഴിന് കോഴിക്കോട് രൂപതയുടെ ആദ്യ തദ്ദേശിയ മെത്രാനായി ബിഷപ് മാക്‌സ്വെല്‍ നെറോണ ചുമതലയേറ്റു. 2002ല്‍ ബിഷപ്പ് ജോസഫ് കളത്തിപ്പറമ്പില്‍ സാരഥ്യമേറ്റെടുത്തു. അദ്ദേഹം റോമില്‍ നിയമിതനായതോടെ മോണ്‍. വിന്‍സെന്റ് അറയ്ക്കല്‍ അഡ്മിനിസ്‌ട്രേറ്ററായി. 2012ല്‍ ചുമതലയേറ്റ ബിഷപ്പ് ഡോ.വര്‍ഗീസ് ചക്കാലയ്ക്കലാണ് ശതാബ്തി വര്‍ഷത്തിലും രൂപതയെ നയിക്കുന്നത്. മലബാറിന്റെ മണ്ണില്‍ മതസൗഹാര്‍ദം ഊട്ടിയുറപ്പിക്കുന്നതിനു രൂപത വഹിച്ച പങ്ക് ഏറെ വലുതാണ്.