‘വിദേശവനിതയുടെ തല വേര്‍പെട്ടു കിടന്നു’: ഒന്നാം സാക്ഷി കോടതിയില്‍ മൊഴി നല്‍കി

വിദേശ വനിത കൊല്ലപ്പെട്ട കേസിലെ ഒന്നാം സാക്ഷി ഇന്ന് കോടതിയില്‍ ഹാജരായി മൊഴി നല്‍കി. ആരോഗ്യ പ്രശ്‌നങ്ങള്‍ കാരണമാണു കഴിഞ്ഞ ദിവസം കോടതിയില്‍ എത്താന്‍ കഴിയാത്തതെന്ന് സാക്ഷിയായ പ്രദീപ് വിശദീകരിച്ചു. യൂത്ത് കോണ്‍ഗ്രസ് പ്രാദേശിക നേതാവാണ് പ്രദീപ്. സ്ഥലവാസിയായ ഒരു വ്യക്തി തന്നെ മൊബൈല്‍ ഫോണില്‍ വിളിച്ചു കുറ്റിക്കാട്ടില്‍ ഒരു ജീര്‍ണിച്ച ശരീരം കിടക്കുന്നതു കണ്ടകാര്യം പറയുകയായിരുന്നെന്നു പ്രദീപ് കോടതിയെ അറിയിച്ചു. സ്ഥലവാസി അല്ലാത്തതിനാല്‍ സ്ഥലത്തെക്കുറിച്ച് അറിയില്ല. തുടര്‍ന്നു പൊലീസിനെ വിളിച്ചു വിവരം പറഞ്ഞു. യുവതിയുടെ ശരീരത്തില്‍ ജാക്കറ്റും അടിവസ്ത്രങ്ങളും ഉണ്ടായിരുന്നു. ശരീരത്തില്‍നിന്നും തല വേറിട്ടാണ് കിടന്നത്. യുവതിയുടെ ശരീരം കിടന്ന സ്ഥലത്തുനിന്ന് 50 മീറ്റര്‍ മാറി ഒരു വീടുണ്ടായിരുന്നു എന്നും പ്രദീപ് മൊഴി നല്‍കി. സാക്ഷിവിസ്താരം നാളെയും തുടരും.