‘വിദേശ വനിതയുടെ മൃതദേഹം തലവേര്‍പെട്ട് തിരിച്ചറിയാനാകാത്ത നിലയില്‍’; കൂറുമാറി ഉമ്മര്‍ ഖാന്‍

തിരുവനന്തപുരം: കോവളത്ത് പീഡനത്തിനിരയായി മരിച്ച വിദേശ വനിതയുടെ മൃതദേഹം കുറ്റിക്കാട്ടിലെ വള്ളികളില്‍ കുരുങ്ങി കിടക്കുന്നതു കണ്ടപ്പോള്‍ തല വേര്‍പ്പെട്ടു തിരിച്ചറിയാന്‍ കഴിയാത്ത അവസ്ഥയിലായിരുന്നെന്നു കേസിലെ എട്ടാം സാക്ഷിയും ചിത്രകാരനുമായ ബിനു മൊഴി നല്‍കി. കേസിലെ ഏഴാം സാക്ഷി ഉമ്മര്‍ ഖാന്‍ കൂറുമാറി. കൊല്ലപ്പെട്ട യുവതിയുടെ ജാക്കറ്റ് രണ്ടാം പ്രതി ഉമേഷ് കോവളത്ത് തുണിക്കട നടത്തുന്ന ഉമ്മര്‍ ഖാന്റെ കടയില്‍ കൊണ്ടുവന്നിരുന്നു എന്നു പൊലീസിനു നല്‍കിയിരുന്ന മൊഴിയാണു കോടതിയില്‍ മാറ്റി പറഞ്ഞത്. ലൈസന്‍സ് ഇല്ലാതെയാണു കട നടത്തുന്നതെന്നു ഉമ്മര്‍ ഖാന്‍ വിചാരണയ്ക്കിടെ മറുപടി നല്‍കിയപ്പോള്‍ ക്ഷുഭിതനായ ജഡ്ജി, കോവളം പോലെ നിരവധി വിനോദസഞ്ചാരികള്‍ എത്തുന്ന പ്രദേശത്ത് ലൈസന്‍സ് ഇല്ലാതെ കടകള്‍ പ്രവര്‍ത്തിക്കുവാന്‍ കോര്‍പ്പറേഷന്‍ എങ്ങനെ അനുമതി നല്‍കിയെന്ന് ആരാഞ്ഞു. ഇത്തരം സ്ഥാപനങ്ങള്‍ക്കെതിരെ കര്‍ശന നടപടി സ്വീകരിക്കാന്‍ കോര്‍പറേഷന്‍ അധികാരികള്‍ക്കു നിര്‍ദേശം നല്‍കി. 2018 മാര്‍ച്ച് 14ന് കോവളത്ത് നിന്നു യുവതിയെ സമീപത്തുള്ള കുറ്റികാട്ടില്‍ കൂട്ടികൊണ്ടുപോയി ലഹരി വസ്തു നല്‍കി പീഡിപ്പിച്ചെന്നാണ് പ്രോസിക്യൂഷന്‍ കേസ്. ഉദയന്‍, ഉമേഷ് എന്നിവരാണ് കേസിലെ രണ്ടു പ്രതികള്‍.