കക്കാനിറങ്ങുന്നതും കാമുകിക്കൊപ്പം; റിയാദിനൊപ്പം ഫെയ്സ്ബുക്കില്‍ പരിചയപ്പെട്ട നാലാമത്തെ യുവതി

തൃശൂര്‍ വിനോദയാത്ര പോകുമ്പോള്‍ ഗേള്‍ഫ്രണ്ടിനെ ഒപ്പം കൊണ്ടുപോകുന്നവരില്‍ നിന്നു വ്യത്യസ്തനാണു കൊരട്ടി സ്വദേശി റിയാദ്. ഉല്ലാസയാത്രയ്ക്കായല്ല റിയാദ് കാമുകിയെ ഒപ്പംകൂട്ടിയത്, കവര്‍ച്ച നടത്താന്‍ വേണ്ടിയാണ്! മുനമ്പത്തെ പെട്രോള്‍ പമ്പില്‍ നിന്നു പണം കവര്‍ന്ന സംഭവത്തില്‍ റിയാദ് ഉള്‍പ്പെടെയുള്ള മൂന്നംഗ കവര്‍ച്ചാ സംഘത്തെ നിഴല്‍പൊലീസ് പിടികൂടിയപ്പോഴാണ്, തന്റെയൊപ്പം കാമുകി കൂടി ഉണ്ടായിരുന്നുവെന്നു റിയാദ് വെളിപ്പെടുത്തിയത്. സിസിടിവി ദൃശ്യം പരിശോധിച്ചപ്പോള്‍ സംഭവം ശരിയാണെന്നു വ്യക്തമായതോടെ എറണാകുളം സ്വദേശി ജ്യോത്സന മാത്യുവിനെ മുനമ്പം പൊലീസ് അറസ്റ്റ് ചെയ്തു. തൃശൂര്‍, എറണാകുളം ജില്ലകളിലായി 12 പെട്രോള്‍ പമ്പുകളില്‍ നിന്നു പണം കവര്‍ന്ന കേസില്‍ പ്രതികളായ കൊരട്ടി മാമ്പ്ര ചെമ്പട്ടില്‍ റിയാദ് (20), മലപ്പുറം താനൂര്‍ അട്ടത്തോട് താണിക്കടവന്‍ റഫീക്ക് (ശിഹാബ് - 32), അരീക്കോട് തെരാട്ടുമ്മല്‍ നെല്ലിപ്പാവുങ്കല്‍ നൗഫാന്‍ (27) എന്നിവരെ തൃശൂര്‍ മുളങ്കുന്നത്തുകാവിലെ ഹോട്ടലില്‍ നിന്നാണു പൊലീസ് പിടികൂടിയത്. ഹോട്ടലിലെ 108ാം നമ്പര്‍ മുറിയില്‍ റിയാദ് ഉണ്ടെന്ന വിവരത്തിനു പിന്നാലെ അന്വേഷിച്ചെത്തിയ പൊലീസ് സംഘം കണ്ടത് കഞ്ചാവുവലിച്ചു കൊണ്ടിരുന്ന പ്രതിയെയാണ്. കഞ്ചാവുവലിക്കു സാക്ഷിയായി കാമുകിയും ഒപ്പമുണ്ടായിരുന്നു. കവര്‍ച്ചയ്ക്കു പോയപ്പോള്‍ കാമുകിയെ ഒപ്പം കൂട്ടിയതെന്തിനെന്ന ചോദ്യത്തിനു വ്യക്തമായ ഉത്തരം റിയാദ് വെളിപ്പെടുത്തിയില്ല. ഫെയ്‌സ്ബുക്കില്‍ പരിചയപ്പെട്ട നാലാമത്തെ യുവതിയാണു തനിക്കൊപ്പമുള്ളതെന്നു റിയാദ് വെളിപ്പെടുത്തി. മോഷ്ടാവാണെന്ന വിവരം 4 പേരോടും റിയാദ് പറഞ്ഞിരുന്നത്രേ. 4 ബൈക്കുകള്‍, 3 കാറുകള്‍ എന്നിവയും ഇക്കാലത്തിനിടെ റിയാദ് മോഷ്ടിച്ചിട്ടുണ്ട്. ചില കേസുകളില്‍ ശിക്ഷിക്കപ്പെട്ടു ജയിലില്‍ കഴിഞ്ഞ ശേഷം ഏതാനും മാസം മുന്‍പാണു പുറത്തിറങ്ങിയത്. പട്ടാമ്പി റോഡിലുള്ള സി.കെ.താവു ആന്‍ഡ് കമ്പനിയുടെ പമ്പില്‍ നിന്ന് 3.5 ലക്ഷവും കാണിപ്പയ്യൂര്‍ മാള ഫ്യൂവല്‍സില്‍ നിന്ന് 12,000 രൂപയും മോഷ്ടിച്ച കേസിലാണു നിഴല്‍ പൊലീസ് റിയാദിനെ അറസ്റ്റ് ചെയ്തത്. കാര്യമായി പണം തടയുന്ന ഓരോ മോഷണത്തിനു ശേഷവും ആഡംബര ജീവിതമാണു തന്റെ പതിവെന്നു പ്രതി പൊലീസിനോടു പറഞ്ഞു. റിസോര്‍ട്ടുകളില്‍ മുറിയെടുത്തു പണം തീരുംവരെ താമസിക്കും. അതിനു ശേഷം അടുത്ത മോഷണത്തിനു പദ്ധതിയിടുമെന്നും പൊലീസിനോട് പറഞ്ഞു.