‘ജലീലുമായോ സര്‍ക്കാരുമായോ ഇടപാടില്ല’; സ്വപ്നയുടെ ആരോപണം തള്ളി ഫ്‌ലൈ ജാക്ക്

മാധവ വാര്യര്‍ മുന്‍മന്ത്രി കെ.ടി.ജലീലിന്റെ ബെനാമിയാണെന്ന നയതന്ത്ര സ്വര്‍ണക്കടത്ത് കേസ് പ്രതി സ്വപ്ന സുരേഷിന്റെ ആരോപണങ്ങള്‍ അടിസ്ഥാനരഹിതമെന്ന് മുംബൈയിലെ ഫ്‌ലൈ ജാക്ക് ലൊജിസ്റ്റിക്‌സ് കമ്പനി. കെ.ടി ജലീലുമായോ സംസ്ഥാന സര്‍ക്കാരുമായോ യാതൊരു ഇടപാടുകളും നടത്തിയിട്ടില്ലെന്ന് കമ്പനി വാര്‍ത്താക്കുറിപ്പില്‍ വ്യക്തമാക്കി. സ്വപ്നയുടെ ആരോപണങ്ങള്‍ അടിസ്ഥാനരഹിതവും കെട്ടിച്ചമച്ചതുമാണ്. സ്ഥാപകരില്‍ ഒരാളായ മാധവ വാര്യര്‍ 2014ല്‍ ചുമതലകള്‍ ഒഴിഞ്ഞുവെന്നും ഫ്‌ലൈ ജാക്കിന്റെ വാര്‍ത്താകുറിപ്പില്‍ വ്യക്തമാക്കുന്നു. വിവാദങ്ങളുടെ പശ്ചാത്തലത്തില്‍ കമ്പനി ഡയറക്ടര്‍ ജെ. ശ്യാം സുന്ദറാണ് വിശദീകരണ കുറിപ്പ് ഇറക്കിയത്. ഫ്‌ലൈ ജാക്ക് ലൊജിസ്റ്റിക്‌സ് കമ്പനി ഉടമയായ മാധവ വാര്യര്‍ ജലീലിന്റെ ഇടപാടുകള്‍ക്ക് മുന്നില്‍ നിന്നിട്ടുണ്ടെന്ന് സ്വപ്ന സുരേഷ് സത്യവാങ്മൂലത്തില്‍ ആരോപിച്ചിരുന്നു. മുംബൈയിലെ ഫ്‌ലൈ ജാക്ക് ലോജിസ്റ്റിക്‌സ് വഴി കെ.ടി.ജലീല്‍ 17 ടണ്‍ ഈന്തപ്പഴം ഇറക്കുമതി ചെയ്‌തെന്നും കമ്പനിയുടെ ഉടമ മാധവ വാര്യര്‍ കെ.ടി.ജലീലിന്റെ ബെനാമിയാണെന്ന് കോണ്‍സുല്‍ ജനറല്‍ തന്നോട് പറഞ്ഞിട്ടുണ്ടെന്നാണ് സ്വപ്ന സത്യവാങ്മൂലത്തില്‍ ആരോപിക്കുന്നത്. അതേസമയം, മാധവ് വാര്യരുമായി തര്‍ക്കമില്ലെന്ന് എച്ച്ആര്‍ഡിഎസ് ചീഫ് പ്രൊജക്ട് കോ-ഓര്‍ഡിനേറ്റര്‍ ജോയ് മാത്യു അറിയിച്ചു. മാധവ് വാര്യരുടെ കമ്പനിക്കാണ് അട്ടപ്പാടിയിലെ വീട് നിര്‍മാണ കരാര്‍ നല്‍കിയത്. 192 വീടുകള്‍ നിര്‍മിച്ചതില്‍ ചിലത് പൂര്‍ത്തിയായിട്ടില്ല. ഇതാണ് പണം നല്‍കാത്തതിന് കാരണം. ഇനി രണ്ടര കോടി രൂപയാണ് നല്‍കാനുള്ളത്. പണി പൂര്‍ത്തിയായാലുടന്‍ പണം നല്‍കും. വീട് പണി പൂര്‍ത്തിയാക്കാത്തതിന് മാധവ് വാര്യരുടെ കമ്പനിക്ക് നോട്ടിസ് നല്‍കിയിരുന്നു. മാധവ് വാര്യര്‍ക്ക് നല്‍കിയ ചെക്ക് മടങ്ങിയത് സാങ്കേതികത്വം മാത്രമെന്നും ജോയ് മാത്യു പറഞ്ഞു.