അഗ്‌നിപഥ് പ്രതിഷേധം കേരളത്തിലും; രാജ്ഭവന്‍ മാര്‍ച്ചില്‍ പങ്കെടുത്തത് 300 പേര്‍

കേന്ദ്ര സര്‍ക്കാരിന്റെ അഗ്‌നിപഥ് സ്‌കീമിനെതിരായുള്ള പ്രതിഷേധം കേരളത്തിലും. തിരുവനന്തപുരത്തും കോഴിക്കോട്ടും പ്രതിഷേധം അരങ്ങേറി. തിരുവനന്തപുരത്ത് രാജ്ഭവനിലേക്കു നടത്തിയ മാര്‍ച്ചില്‍ 300ല്‍ അധികം പേര്‍ പങ്കെടുത്തു. വിവിധ ജില്ലകളില്‍ ഇടത്, വലത് വിദ്യാര്‍ഥി സംഘടനകള്‍ പ്രതിഷേധം നടത്തി. കോഴിക്കോട് സൈന്യത്തിലേക്കുള്ള പൊതുപ്രവേശന പരീക്ഷ നടത്തണമെന്നാവശ്യപ്പെട്ട് ഉദ്യോഗാര്‍ഥികള്‍ റെയില്‍വേ സ്റ്റേഷനിലേക്ക് മാര്‍ച്ച് നടത്തി. ഒന്നര വര്‍ഷം മുന്‍പ് ഫിസിക്കല്‍, മെഡിക്കല്‍ പരീക്ഷകള്‍ പാസായി എഴുത്തു പരീക്ഷയ്ക്കു കാത്തിരിക്കുന്ന വിദ്യാര്‍ഥികളാണ് മാര്‍ച്ച് നടത്തിയത്. അഗ്‌നിപഥ് പദ്ധതി വരുന്നതിനു മുന്നോടിയായി ഈ പ്രവേശന പരീക്ഷ നടത്താന്‍ സാധ്യതയില്ലെന്ന സൂചനകളെ തുടര്‍ന്നാണ് സമരം നടത്തിയത്. 3 ജില്ലകളിലെ 3000 ത്തോളം ഉദ്യോഗാര്‍ഥികളാണ് പരീക്ഷയ്ക്കായി കാത്തിരിക്കുന്നത്. ഒന്നര ലക്ഷം പേര്‍ അപേക്ഷിച്ച പരീക്ഷയില്‍ നിന്ന് തിരഞ്ഞെടുക്കപ്പെട്ട 5000 ഉദ്യോഗാര്‍ഥികളാണ് കേരളത്തിലുള്ളത്. അതേസമയം, അഗ്‌നിപഥ് പ്രതിഷേധത്തേത്തുടര്‍ന്ന് കേരളത്തിലേക്കുള്ള രണ്ട് ട്രെയിനുകള്‍ കൂടി റദ്ദാക്കി. നാളെ പുറപ്പെടേണ്ട സെക്കന്ദരാബാദ് - തിരുവനന്തപുരം സെന്‍ട്രല്‍ ശബരി എക്‌സ്പ്രസ്, 20ന് പുറപ്പെടേണ്ട എറണാകുളം - പട്‌ന ബൈ വീക്കലി എക്‌സ്പ്രസ് എന്നിവയാണു റദ്ദാക്കിയത്. ഇന്നലെ പുറപ്പെടേണ്ടിയിരുന്ന പട്‌ന - എറണാകുളം ബൈ വീക്ക്ലി സൂപ്പര്‍ ഫാസ്റ്റും, സെക്കന്തരാബാദ് - തിരുവനന്തപുരം ശബരിയും നേരത്തെ റദ്ദാക്കിയിരുന്നു.