സാമൂഹ്യ മാധ്യമങ്ങളിലൂടെ വിവാഹ വാഗ്ദാനം നല്‍കി യുവതികളെ പീഡിപ്പിച്ച ആള്‍ അറസ്റ്റില്‍

തൃശ്ശൂര്‍: സാമൂഹ്യ മാധ്യമങ്ങളിലൂടെ വിവാഹ വാഗ്ദാനം നല്‍കി യുവതികളെ പീഡിപ്പിച്ച കേസില്‍ ഒരാളെ തൃശ്ശൂര്‍ ടൗണ്‍ പൊലീസ് അറസ്റ്റ് ചെയ്തു. കട്ടപ്പന സ്വദേശി ഷിനോജാണ് അറസ്റ്റിലായത്. ഇയാള്‍ക്കെതിരെ പരാതിയുമായി കൂടുതല്‍ സ്ത്രീകള്‍ എത്തിയിട്ടുണ്ടെന്ന് പൊലീസ് അറിയിച്ചു ഫേസ്ബുക്കിലെ ഡിവോഴ്‌സ് മാട്രിമോണി ഗ്രൂപ്പുകളില്‍ അംഗങ്ങളായവരാണ് ഇരകളില്‍ അധികവും. പുനര്‍വിവാഹത്തിനായി രജിസ്റ്റര്‍ ചെയ്തിരിക്കുന്ന യുവതികളെ ഷിനോജ് വിവാഹം കഴിക്കാമെന്ന് സമ്മതിപ്പിച്ചാണ് പീഡനം. തൃശ്ശൂര്‍ സ്വദേശിയുടെ പരാതിയിലാണ് ആദ്യ അറസ്റ്റ്. സംഭവം പൊലീസ് പറയുന്നത് ഇങ്ങനെ. ഫേസ്ബുക്കിലൂടെ പരിചയപ്പെട്ട യുവതിയെ ഈ മാസം പതിമൂന്നിന് വിവാഹം കഴിക്കാമെന്ന് പറഞ്ഞ് തൃശ്ശൂരില്‍ എത്തിച്ചു. വിവാഹം ഗുരുവായൂരില്‍ ആയതിനാല്‍ തൃശ്ശൂര്‍ ടൗണില്‍ റൂമെടുത്താണ് പീഡനം. യുവതി കുളിക്കാന്‍ പോകുന്ന സമയം ഫോണിലുള്ള ഇയാളുടെ നമ്പര്‍ അടക്കം എല്ലാ വിവരങ്ങളും മായ്ചു കളഞ്ഞു. പിറ്റേന്ന് ബസ് സ്റ്റാന്‍ഡില്‍ യുവതിയുമായി എത്തിയെങ്കിലും ഷിനോജ് കടന്നുകളഞ്ഞു. കട്ടപ്പന സ്വദേശിയായ ഇയാള്‍ക്ക് ഭാര്യയും രണ്ട് കുട്ടികളും ഉണ്ട്. ആദ്യ കേസില്‍ അറസ്റ്റ് ഉണ്ടായതിന് പിന്നാലെ നാല് യുവതികള്‍ കൂടി ഷിനോജിനെതിരെ പരാതിയുമായി രംഗത്തെത്തി. ബലാത്സംഗ വകുപ്പ് ചുമത്തിയാണ് ഷിനോജിനെ ടൗണ്‍ പൊലീസ് അറസ്റ്റ് ചെയ്തത്.