‘മാസ്‌ക് വയ്ക്കാന്‍ ആവശ്യപ്പെട്ടതിന്റെ വൈരാഗ്യം; നീണ്ടകര താലൂക്ക് ആശുപത്രിയില്‍ രണ്ട് ദിവസം മുന്‍പും ആക്രമണം നടന്നിരുന്നു

നീണ്ടകര താലൂക്ക് ആശുപത്രിയിലെ അക്രമത്തെ കുറിച്ചുള്ള കൂടുതല്‍ വിവരങ്ങള്‍ പുറത്ത്. പ്രതികള്‍ രണ്ടു ദിവസം മുന്‍പും ആശുപത്രിയില്‍ അക്രമം ഉണ്ടാക്കിയെന്നും ആംബുലന്‍സ് ഡ്രൈവറെ ഉള്‍പ്പെടെ മര്‍ദ്ദിച്ചുവെന്നും അധികൃതര്‍ വ്യക്തമാക്കി. മര്‍ദന ദൃശ്യങ്ങള്‍ ട്വന്റിഫോറിന് ലഭിച്ചു. രണ്ടു ദിവസം മുന്‍പ് പ്രതികള്‍ ആശുപത്രിയിലെത്തിയപ്പോള്‍ മാസ്‌ക് വയ്ക്കാന്‍ പറഞ്ഞിരുന്നു. ഇതിന്റെ വൈരാഗ്യമാണ് അക്രമത്തിന് പിന്നിലെന്ന് ഇന്നലെ ഡ്യൂട്ടിയിലുണ്ടായിരുന്ന നഴ്സ് ശാലിനി പറയുന്നു. കൊല്ലുമെന്ന് ഭീഷണിപ്പെടുത്തിക്കൊണ്ടായിരുന്നു മര്‍ദനം. ഡ്രൈവറുടെ തലക്കടിയേല്‍ക്കാതെ രക്ഷപ്പെട്ടത് തലനാരിഴയ്ക്ക് എന്ന് നഴ്സ് പറയുന്നു. ആശുപത്രിയില്‍ സാമൂഹികവിരുദ്ധ ശല്യം രൂക്ഷമാണെന്നും പരാതിപ്പെട്ടിട്ടുണ്ട്. ആശുപത്രിയില്‍ ചികിത്സ നിഷേധം ഉണ്ടായിട്ടില്ലെന്ന് കെജിഎംഒഎയും വ്യക്തമാക്കി. നീണ്ടകര താലൂക്ക് ആശുപത്രിയില്‍ ഒപി ബഹിഷ്‌കരണം നടക്കുകയാണ്. പ്രതികളെ പിടികൂടിയില്ലെങ്കില്‍ ജില്ല മുഴുവന്‍ സമരം വ്യാപിപ്പിക്കുമെന്ന് കെജിഎംഒഎ അറിയിച്ചു.