ബലാത്സംഗക്കേസില്‍ മൊഴി മാറ്റാന്‍ വിസമ്മതിച്ചയാളെ തല്ലിക്കൊന്നു

പേരക്കുട്ടിയെ ബലാത്സംഗം ചെയ്ത കേസില്‍ പ്രതികള്‍ക്കെതിരായ മൊഴി മാറ്റാന്‍ വിസമ്മതിച്ച 55 കാരനെ തല്ലിക്കൊന്നു. കര്‍ഷകനായ മധ്യവയസ്‌കനെ മക്കളുടെ മുന്നില്‍ വച്ച് പ്രതിയുടെ കുടുംബാംഗങ്ങള്‍ ചേര്‍ന്ന് മര്‍ദിച്ചു കൊലപ്പെടുത്തി. ഉത്തര്‍പ്രദേശിലെ മിര്‍ഗഞ്ചിലാണ് സംഭവം. മക്കളുമൊത്ത് മരുന്നുവാങ്ങാന്‍ പോകുംവഴിയാണ് പ്രതിയുടെ കുടുംബാംഗങ്ങള്‍ ഇയാളെ തടഞ്ഞു നിര്‍ത്തിയത്. മഹേന്ദ്ര, രാഹുല്‍, രാംസ്വരൂപ്, ഭഗവാന്‍ ദാസ് എന്നിവര്‍ തോക്കുകള്‍ കൈവശം വച്ചിരുന്നു. മൊഴി മാറ്റണമെന്ന് ആവശ്യപ്പെട്ട് മധ്യവയസ്‌കനെ ഭീഷണിപ്പെടുത്തിയെങ്കിലും അദ്ദേഹം വിസമ്മതിച്ചതായി ഇരയുടെ മകന്‍ നല്‍കിയ പരാതി ഉദ്ധരിച്ച് പൊലീസ് സൂപ്രണ്ട് (റൂറല്‍) രാജ്കുമാര്‍ അഗര്‍വാള്‍ പറഞ്ഞു. തര്‍ക്കം രൂക്ഷമായതോടെ നാല് പേരും അക്രമിക്കുകയായിരുന്നു. സഹായത്തിനായി മക്കള്‍ വീട്ടിലേക്ക് ഓടിയപ്പോള്‍ പ്രതികള്‍ കര്‍ഷകനെ വടികൊണ്ട് മര്‍ദ്ദിക്കുകയും സംഭവസ്ഥലത്ത് വച്ച് തന്നെ കൊല്ലുകയും ചെയ്തു. പിന്നീട് ഗ്രാമവാസികള്‍ ഇയാളുടെ മൃതദേഹം റോഡരികില്‍ കിടക്കുന്നത് കണ്ട് പൊലീസില്‍ അറിയിക്കുകയായിരുന്നു. ഒരു വര്‍ഷം മുമ്പ് സൂരജ്പാല്‍ തന്റെ അനന്തരവളെ ബലാത്സംഗം ചെയ്തിരുന്നുവെന്നും അന്നുമുതല്‍ ജയിലിലായിരുന്നുവെന്നും മൂത്ത മകന്‍ പറയുന്നു.