പ്രവാസിയുടെ മരണകാരണം തലയ്‌ക്കേറ്റ ക്ഷതം; പിന്നില്‍ ക്വട്ടേഷന്‍ സംഘം

കാസര്‍കോട് : പ്രവാസിയെ തട്ടിക്കൊണ്ടുപോയി കൊലപ്പെടുത്തിയ സംഭവത്തിനു പിന്നില്‍ ക്വട്ടേഷന്‍ സംഘമാണെന്നു പൊലീസ്. തലയ്‌ക്കേറ്റ ക്ഷതമാണു മരണ കാരണമെന്നാണു പ്രാഥമിക വിവരം. 3 പേരെ പൊലീസ് ചോദ്യം ചെയ്യാനായി കസ്റ്റഡിയിലെടുത്തിട്ടുണ്ട്. രണ്ടു ഡിവൈഎസ്പിമാരുടെ നേതൃത്വത്തില്‍ 16 പേരടങ്ങിയ സംഘമാണു കൊലപാതകക്കേസ് അന്വേഷിക്കുക. പുത്തിഗെ മുഗു റോഡിലെ നസീമ മന്‍സിലിലെ അബൂബക്കര്‍ സിദ്ദിഖാണ് (31) കഴിഞ്ഞദിവസം കൊല്ലപ്പെട്ടത്. മഞ്ചേശ്വരം സ്വദേശിയുമായി ബന്ധപ്പെട്ട് അബൂബക്കര്‍ സിദ്ദിഖിന് വിദേശത്തുണ്ടായ സാമ്പത്തിക ഇടപാടുകളിലെ തര്‍ക്കമാണു കൊലപാതകത്തിന് ഇടയാക്കിയതെന്നാണു പൊലീസിന്റെ പ്രാഥമിക നിഗമനം. മഞ്ചേശ്വരം സ്വദേശിയായ ഇയാളാണ് പൈവളിഗെ കേന്ദ്രമാക്കി പ്രവര്‍ത്തിക്കുന്ന ക്വട്ടേഷന്‍ സംഘത്തെ നിയോഗിച്ചത്. സിദ്ദീഖിനെ ആശുപത്രിയിലെത്തിച്ച ശേഷം പ്രതികള്‍ കടന്നുകളഞ്ഞ വാഹനം പിന്നീട് ഉപേക്ഷിച്ച നിലയില്‍ തലപ്പാടിക്കു സമീപം തൊക്കോട്ട് ഇന്നലെ പുലര്‍ച്ചെ കണ്ടെത്തി. ഈ വാഹനത്തിന്റെ ഉടമ ഉള്‍പ്പെടെയുള്ളവരെയാണു കസ്റ്റഡിയില്‍ ചോദ്യം ചെയ്യുന്നത്. സിദ്ദിഖിനെ ബന്തിയോട് ആശുപത്രിയില്‍ എത്തിക്കുന്നതിന് അര മണിക്കൂര്‍ മുന്‍പെങ്കിലും മരണം സംഭവിച്ചിട്ടുണ്ടെന്നും ഡോക്ടര്‍ വ്യക്തമാക്കി. വിവരമറിയിക്കാന്‍ ആശുപത്രി അധികൃതര്‍ പുറത്തെത്തും മുന്‍പ് എത്തിച്ചവര്‍ കടന്നു കളഞ്ഞിരുന്നു. ഈ സമയത്ത് ലഭിച്ച സിസിടിവി ദൃശ്യങ്ങളില്‍ നിന്നാണു വാഹനത്തെയും പ്രതികളെയും തിരിച്ചറിഞ്ഞത്.